Хакеры выкралі сотні тысяч асабістых звестак у авіякампаніі AirBaltic
У выніку кібератакі адбыўся выцек персанальных даных амаль 618 тысяч пасажыраў латвійскай авіякампаніі AirBaltic. Кампанія паведаміла пра несанкцыянаваны доступ да інфармацыі, якая выкарыстоўвалася для анлайн-рэгістрацыі на рэйсы.
Здымак ілюстрацыйны. Фота: Dursun Aydemir/Anadolu via Getty Images
Інцыдэнт адбыўся ў інфармацыйных сістэмах старонняга пастаўшчыка IT-паслуг.
Выцек закрануў пасажыраў, якія зарэгістраваліся праз інтэрнэт на рэйсы з 18 ліпеня да 12 лістапада 2026 года. Паводле папярэдніх звестак, каля 11,8 тысячы з гэтых рэзерваванняў тычацца будучых палётаў.
Зламыснікі атрымалі доступ да імёнаў пасажыраў, нумароў рэзервацыі ды інфармацыі пра рэйсы. Пры гэтым звесткі аб плацяжах і праязных дакументах не пацярпелі.
У мэтах бяспекі airBaltic часова адключыла магчымасць кіраваць браніраваннямі і праходзіць анлайн-рэгістрацыю на рэйсы. У кампаніі падкрэслілі, што яе ўласныя інфармацыйныя сістэмы ўзламаныя не былі: атака закранула інфраструктуру знешняга пастаўшчыка IT-паслуг.
Пакуль няма прыкмет таго, што скрадзеныя звесткі ўжо выкарыстоўваюцца для махлярства, аднак такая рызыка існуе.
Раней airBaltic звярнулася ў амерыканскі суд па абарону ад крэдытораў. Кампанія плануе рэструктурызаваць свае даўгі на фоне пагаршэння сітуацыі ў авіяцыйнай галіне, звязанай з ростам цэн на паліва.
88,37% акцый авіякампаніі належыць Латвіі, яшчэ 10% — нямецкай Lufthansa, 1,62% — фінансісту Ларсу Тусэну. Астатнія акцыі знаходзяцца ў дробных інвестараў.
Чытайце таксама:
Авіякампанія AirBaltic пайшла ў санацыю
Найлепшыя авіякампаніі свету па версіі пасажыраў
Кіраўнік Ryanair прарочыць хуткую смерць Wizz Air і Air Baltic