БЕЛ Ł РУС

Мінск прыме расійска-грузінскія перамовы

18.11.2026 / 23:16

Nashaniva.com

19 лістапада ў Мінску адбудзецца першая сустрэча спецыяльнага прадстаўніка прэм'ер-міністра Грузіі па сувязях з Расіяй Георгія Зурабашвілі і намесніка міністра замежных спраў Расіі Міхаіла Галузіна, паведаміў урад Грузіі.

Здымак ілюстрацыйны. Фота: vecteezy.com

Як паведамляецца ў заяве грузінскага ўрада, бакі плануюць абмеркаваць пашырэнне гандлю, павелічэнне турыстычнага абмену паміж дзвюма краінамі, а таксама развіццё культурных сувязяў.

Пра прызначэнне Георгія Зурабашвілі, які ў 2024—2025 гадах займаў пасаду намесніка міністра замежных спраў Грузіі, спецыяльным прадстаўніком прэм'ер-міністра Грузіі па сувязях з Расіяй, стала вядома ў канцы кастрычніка. Сярод галоўных задач новага спецпрадстаўніка — мірнае ўрэгуляванне канфлікту з Расіяй, захаванне і развіццё існых гандлёва-эканамічных сувязяў, а таксама пастаянны дыялог па гуманітарных пытаннях.

Пры гэтым дыпламатычныя адносіны паміж Грузіяй і Расіяй пасля 2008 года, калі Расія здзейсніла супраць Грузіі акт агрэсіі, а пасля афіцыйна прызнала незалежнасць Абхазіі і Паўднёвай Асеціі, адсутнічаюць.

Цяпер грузінскія ўлады, у апошнія гады фактычна адмовіўшыся ад ідэі еўраінтэграцыі, спрабуюць аднавіць адносіны з Расіяй. Але для партыі «Грузінская мара», якая нязменна кіруе Грузіяй з 2012 года, было б ударам па рэпутацыі, каб адпаведныя перамовы адбываліся ў Расіі. Таму і ўзнік варыянт Беларусі як «нейтральнай» пляцоўкі.

Чытайце таксама:

Беларуса, якога затрымалі ў Грузіі з пратэрмінаванымі дакументамі, арыштавалі на тры месяцы

Грузія выдварыла 39 беларусаў за дзевяць месяцаў 2026 года

«Грузія так і не стала домам». Айцішнік не змог прызвычаіцца да краіны, хоць падатак складае 1%, — цяпер абірае паміж Іспаніяй і ЗША

Каментары да артыкула