«Ахова птушак Бацькаўшчыны» арганізоўвае ў Мінску экскурсіі для вывучэння птушыных галасоў

10.06.2011 / 10:11

Як паведаміў спецыяліст па экалагічнай адукацыі АПБ Руслан Шайкін, падобныя экскурсіі нідзе больш у Беларусі не праводзяцца. У іх межах усе ахвотныя пад кіраўніцтвам вопытных спецыялістаў-арнітолагаў

могуць паслухаць птушак у зялёных зонах сталіцы: заказніку «Лябяжым», Лошыцкім парку, Батанічным садзе, пойме Свіслачы ў Чыжоўцы.

Удзельнікі экскурсій навучацца адрозніваць птушак па галасах і даведаюцца шмат новага пра жыццё птушак.

Як паведаміў Шайкін, сярод птушак, якія лёгка пазнавальныя па спеве, — салавей, пеначка-ценькаўка, драч, берасцянка, валасянка-завірушка. Аднак, паводле яго слоў, ніхто не можа гарантаваць, што птушкі ўсіх гэтых відаў будуць спяваць падчас экскурсіі. Задача арнітолагаў — навучыць удзельнікаў экскурсіі адрозніваць хоць бы пяць відаў птушак, а па магчымасці — больш, сказаў спецыяліст.

Ён падкрэсліў, што некаторыя віды птушак (напрыклад, разнавіднасці чарацянкі) можна адрозніць толькі па галасах, знешне яны вельмі падобныя. Таму экскурсія можа ўяўляць асаблівую каштоўнасць для будучых спецыялістаў-біёлагаў.

Экскурсіі арганізуюцца па заяўках ахвотных для груп колькасцю да 10 чалавек.

Яны праводзяцца ў межах традыцыйнай акцыі АПБ па ўліку салаўёў, якая праходзіць з сярэдзіны мая. У межах гэтай акцыі гарадскім жыхарам прапаноўваецца паведамляць пра месцазнаходжанне пеўчых салаўёў у офіс АПБ. Па выніках улікаў складаецца салаўіная карта Мінска.

Паводле слоў Шайкіна, усяго ў Мінску налічваецца каля 180 відаў птушак, у сталіцы — больш за 350 пар салаўёў.

Чытайце таксама:

Каментары да артыкула