Пачобут: скарга на прысуд на 16 старонках
Сёння, 20 верасня, на 9:30 у Гродзенскім абласным судзе прызначаны разгляд касацыйнай скаргі журналіста Андрэя Пачобута. Ён абскарджвае свой прысуд, вынесены 5 ліпеня ў Ленінскім раённым судзе Гродна: тры гады зняволення з адтэрміноўкай пакарання на два гады.
Карэспандэнта польскай «Газэты выборчай» Андрэя Пачобута судзілі па абвінавачанні ў абразе і паклёпе на прэзідэнта Беларусі. Журналіста тры месяцы трымалі за кратамі, пакуль ішло следства.
5 ліпеня яго вызвалілі ў судовай залі.
Пачобут паведаміў, што касацыйная скарга складзеная на шаснаццаці старонках. У ёй падрабязна гаворыцца пра парушэнні, якія, паводле Пачобута, былі дапушчаныя следчымі КДБ і пракуратуры.
Журналіст зазначае: у судзе яму сказалі напачатку, што скарга будзе разгледжаная цягам месяцу, але з часу яе падачы мінула больш за два месяцы.