Усіх трох кандыдатак ад БХД не зарэгістравалі

Актывісткам аргкамітэта па стварэнні партыі «Беларуская хрысціянская дэмакратыя» (БХД) Марыне Хоміч, Вользе Кавальковай і Надзеі Іюльскай 22 жніўня было адмоўлена ў рэгістрацыі кандыдатамі ў дэпутаты палаты прадстаўнікоў.

Як паведамляе прэс-служба аргкамітэта, усе трое вылучаліся па выбарчых акругах Мінска. Прычыны адмовы звязаныя з памылкамі пры запаўненні дэкларацыі аб даходах і маёмасці.

«Мяркуючы па тым, як праходзіць рэгістрацыя кандыдатаў у дэпутаты, як фарміраваліся ўчастковыя камісіі, выбары сёлета будуць яшчэ меней дэмакратычнымі і свабоднымі, чым у папярэднія гады», — пракаментаваў сітуацыю сустаршыня БХД Віталь Рымашэўскі.

У той жа час, адзначыў ён, пра рэальную стратэгію ўлад на выбарах трэба меркаваць усё ж па выніках разгляду скаргаў прэтэндэнтаў, якім акруговыя камісіі адмовілі ў рэгістрацыі кандыдатамі ў дэпутаты.

Каментары да артыкула