Раман Краёвец. Адамовіча «здала» жанчына
№ 6 (163), 7 — 14 лютага 2000 г.
Адамовіча «здала» жанчына
Без чатырох дзён два месяцы шукала міліцыя Савецкага райаддзелу сталіцы паэта Славаміра Адамовіча. 8 лютага павінен быў скончыцца тэрмін, на працягу якога праваахоўныя органы мелі права высунуць аўтару верша «Убей президента» абвінавачваньні ў арганізацыі несанкцыяванага шэсьця і спаленьня расейскага трыкалёру 8 сьнежня 1999 году. Хутчэй за ўсё, Адамовіча так бы й не знайшлі, каб ня нашы пільныя грамадзяне. Камэндант інтэрнату ПТВ-24, у якім жыве Славамір, Галіна Лук’янаўна Міхейчык, 4 лютага «здала» паэта ў рукі міліцыі, што называецца, на самым узыходзе сонца.
Пасьля затрыманьня падпальшчыка сьцяга даставілі ў суд Савецкага раёну, дзе Адамовічу судзьдзя Казадаеў вынес прысуд: 50.000 беларускіх рублёў штрафу. Цікава, ці перападзе грамадзянцы Міхейчык з гэтых штрафных тысячаў хоць сотня-другая?
Раман Краёвец