Prejhierman: «Ułady nie stolki chočuć spraścić vizavy režym, kolki stvaryć niejki paradak dnia ŭ adnosinach Biełarusi i ES»
Dyrektar pa daśledavańniach «Libieralnaha kłuba» Jaŭhien Prejhierman prakamientavaŭ zajavu Uładzimira Makieja:
«Zajava ministra źviazana nie stolki z tym, što biełaruskija ŭłady sapraŭdy ličać, što nastaŭ čas spraścić vizavy režym ź ES, kolki z žadańniem stvaryć niejki paradak dnia ŭ adnosinach Biełarusi i ES.
Siońnia taki paradak dnia faktyčna adsutničaje. Navat kali budzie vyrašana pytańnie palitviaźniaŭ, biez čaho ES nie hatovy aktyvizavać adnosiny ź Minskam, nie zusim zrazumieła, pra što mienavita budzie dyjałoh i što daść mahčymaść vyvieści jaho na źmiastoŭny ŭzrovień.
U hetych adnosinach krok Makieja možna acanić jak racyjanalny i razumny. Paśla vilenskaha samitu «Uschodniaje partniorstva» ustupaje ŭ pieryjad stratehičnaj niavyznačanaści.
Paśla pravału padpisańnia Pahadnieńnia ab asacyjacyi z Ukrainaj jeŭrapiejskim palitykam i čynoŭnikam treba jak maha bolš niejkich bačnych vynikaŭ hetaj inicyjatyvy. Vizavaja tema jak raz adkazvaje kryteru važnaści dla instytutaŭ ES i biełaruskaha treciaha siektara, a taksama źjaŭlajecca prymalnaj dyskusijnaj temaj dla biełaruskich uładaŭ.
U toj ža čas naŭrad ci možna čakać chutkaha vyrašeńnia hetaha pytańnia navat pry «kanstruktyŭnym nastroi» z boku Jeŭrapiejskaha sajuza. Akramia tradycyjnaj palityčnaj bojazi, vizavaje pytańnie siońnia maje i ekanamičnaje vymiareńnie dla Biełarusi:
prablema aktyŭnaha šopinh-turyzmu biełaruskich hramadzian u Polščy i Litvie, a taksama adtok pracoŭnaj siły ź Biełarusi. Spraščeńnie vizavaha režymu ź ES zdolna jašče bolš abvastryć hetyja prablemy.
Tamu, pa ŭsioj bačnaści, vizavaj temie być doŭhaihrajučaj na paradku dnia Biełarusi i ES».