«Biełaruśkalij» pamienšyŭ płaciažy ŭ biudžet u 4,5 razu
U 2013 hodzie AAT «Biełaruśkalij», najbujniejšy padatkapłacielščyk Minskaj vobłaści, pamienšyŭ płaciažy ŭ biudžet u 4,5 razu ŭ paraŭnańni z 2012 hodam.U vyniku abłasny biudžet niedaatrymaŭ 3,5 trłn. rubloŭ.
Pavodle danych hałoŭnaha finansavaha ŭpraŭleńnia Minskaha abłvykankama, u minułym hodzie «skłałasia napružanaje vykanańnie hadavoha płana pa padatku na prybytak — 99,1%. Pry hetym udakładnieny hadavy płan pa hetaj krynicy arhanizacyjami z dolaj dziaržavy 50% i bolš vykanany tolki na 67,2%».
Infarmacyja pra vykanańnie biudžetu Minskaj vobłaści pryvodzicca ŭ lutaŭskim numary časopisa «Finansy. Ulik. Aŭdyt», jaki vydajecca Ministerstvam finansaŭ.
Pavodle słoŭ namieśnika načalnika hałoŭnaha finansavaha ŭpraŭleńnia Minskaha abłvykankama Mikałaja Kuchaŭca, źnižeńnie pastupleńniaŭ padatkaŭ u biudžet źviazana ź dziejnaściu «Biełaruśkalija».
«Asnoŭnaja pryčyna — adsutnaść u druhim paŭhodździ pastupleńniaŭ padatku ad najbujniejšaha płacielščyka vobłaści AAT «Biełaruśkalij». U 2013 hodzie heta pradpryjemstva źniziła vypłatu padatkaŭ u biudžet u 4,5 razu, a ŭdzielnaja vaha jaho płaciažoŭ u dachodach biudžetu skaraciłasia z 28% u 2012 hodzie da 6,8% u 2013 hodzie», — pryvodzić viedamasnaje vydańnie Minfina słovy Kuchaŭca.
Jon paviedamiŭ, što ŭ 2013 hodzie 39 arhanizacyj z 73, jakija padlahajuć manitorynhu, dapuścili źnižeńnie padatkovych płaciažoŭ u biudžet da ŭzroŭniu 2012 hoda na ahulnuju sumu 4,2 trłn. rubloŭ u supastaŭnych cenach, u tym liku: «Biełaruśkalij» — na 3,5 trłn. rubloŭ, «Biełdruhčarmiet» — na 79,4 młrd. rubloŭ, Słucki miasakambinat — na 76,5 młrd. rubloŭ, «Minskabłahraservis» — na 72,9 młrd. rubloŭ.
Adkrytaje akcyjaniernaje tavarystva «Biełaruśkalij» źjaŭlajecca adnym z najbujniejšych vytvorcaŭ i eksparcioraŭ kalijnych uhnajeńniaŭ u śviecie. Pavodle danych Mižnarodnaj asacyjacyi ŭhnajeńniaŭ, na jaho dolu prychodzicca siomaja častka suśvietnaha abjomu vytvorčaści kaliju.
U 2013 hodzie, pavodle aficyjnych statdanych, ekspart biełaruskich kalijnych uhnajeńniaŭ u hrašovym vyražeńni skłaŭ 2 młrd. 63 młn. dołaraŭ i źniziŭsia ŭ paraŭnańni z 2012 hodam na 599,3 młn. dołaraŭ.
Pavodle mierkavańnia ekśpiertaŭ, značnaje skaračeńnie kalijnaha ekspartu abumoŭlena niespryjalnaj situacyjaj, jakaja skłałasia ŭ minułym hodzie na kalijnym rynku. Nahadajem, u lipieni 2013 hoda z-za roznahałośsiaŭ ź biełaruskimi ŭładami kiraŭnictva rasijskaha «Urałkalija» abviaściła ab spynieńni prodažaŭ svajoj pradukcyi praź Biełaruskuju kalijnuju kampaniju.
Heta pryviało da źnižeńnia suśvietnych cen na kalijnyja ŭhnajeńni i popytu na pradukcyju, jakuju ekspartuje «Biełaruśkalij». «Čamu rynak miortvy? Niama cenavaha dna. Navošta kuplać, kali zaŭtra nazavuć canu mienšuju?» — zajaŭlaŭ u žniŭni 2013 hoda hienieralny dyrektar «Biełaruśkalija» Valeryj Kiryjenka, adkazvajučy na pytańni žurnalistaŭ.
U čaćviortym kvartale 2013 hoda, pavodle zajaŭ biełaruskaha MZS, «Biełaruśkaliju» ŝdałosia pavialičyć ekspartnyja prodažy ŭhnajeńniaŭ u paraŭnańni z trecim kvartałam, kali popyt na suśvietnym rynku skaraciŭsia z pryčyny dziejańniaŭ «Urałkalija».
U pačatku 2014 hoda padčas adnoj z vytvorčych narad kiraŭnictva «Biełaruśkalija» kanstatavała, što finansavaje stanovišča pradpryjemstva pa-raniejšamu zastajecca napružanym, adnak situacyja prykmietna palepšyłasia ŭ paraŭnańni z vosieńskimi miesiacami 2013 hoda.