Eduard Palčys: Što vy robicie, niahodniki?
«Niahodniki! — piša ŭ liście ŭ «Našu Nivu» aryštavany błohier Edurad Palčys (bolš viadomy jak Džon Silvier). — Atrymaŭ ad vas šykoŭnuju štuku — miesiačnik! Fajnaja zadumka, i dla pieršaha vypusku, padrychtavanaha za tydzień, atrymałasia niadrenna, dy i tema vybrana karysnaja. Ale što ja baču ŭ artykule «Top-5 technałohij… abličča armij u XXI stahodździ» (dla «topaŭ» biarycie nazvu pakaraciej)? Tam spojler «Hulni tronaŭ»! Ja z krasavika abaraniaŭsia ad spojleraŭ GoT, a tut taki padvoch! Ździekujeciesia z palitviaźnia horš, čym KDB! Lepš by ŭžo ab pryvatnym žyćci Šyły napisali. Kab vam zahładzić svaju vinu, treba mnie atrymać druhi vypusk miesiačnika. Budu čakać.
P.S. Za pryhožych dziaŭčat u vyšyvancy na apošniaj staroncy — dziakuj», — dadaje jon.
Jak paviedamlałasia raniej, błohiera Eduarda Palčysa, viadomaha pad psieŭdanimam Džon Silvier, 26 maja etapavali z Branskaha SIZA Rasii ŭ Biełaruś.
Pisać jamu možna na adras: 222160, Minskaja vobłaść, h. Žodzina, vuł. Savieckaja, 22A, turma №8. Palčysu Eduardu Alaksandraviču.
Błohiera, aŭtara bajavitaha sajta 1863x.com, zatrymali 23 studzienia pry pierasiačeńni ŭkrainska-rasijskaj miažy. Paśla hetaha identyčnaść błohiera raskryŭ adzin z rasijskich nacyjanalistyčnych sajtaŭ, jon ža apublikavaŭ turemnyja zdymki chłopca.
Jak akazałasia, błohiera zvać Eduard Palčys, jamu 25 hadoŭ, jon rodam ź Lidy (Hrodzienskaja vobłaść). Sam błohier nazyvaŭ siabie Jhon Silver.
Svajho sapraŭdnaha imia dla publiki jon nie raskryvaŭ, choć pravaachoŭnym orhanam jano było viadomaje. Suprać jaho ŭ Biełarusi letaś byli zaviedzienyja kryminalnyja spravy, a jon parušyŭ padpisku pra niavyjezd i razam z žonkaj vyjechaŭ va Ukrainu, dzie chacieŭ atrymać palityčny prytułak.
Błohier raskazvaŭ, što ŭ Biełarusi jaho spačatku abvinavacili pa 130 artykule KK RB — raspalvańnie varožaści pa nacyjanalnaj prykmiecie za hety materyjał na sajcie 1863ch.com, a taksama za inšyja artykuły ŭ padtrymku Ukrainy na sajcie. Śledčyja interpretavali zaklik «Zabi «Ruski śviet» jak zaklik da zabojstva ŭsich ruskich.
Pravaabaroncy ličać Eduarda Palčysa viaźniem sumleńnia.