Nazvali imiony rasijan, jakich padazrajuć u padrychtoŭcy pieravarotu ŭ Čarnahoryi
Sprobu pieravarotu ŭ Čarnahoryi arhanizavali rasijanie Eduard Šyrokaŭ i Uładzimir Papoŭ. Pra heta sa spasyłkaj na miascovuju prakuraturu paviedamlaje partał CDM.
Aryšt adnaho z udzielnikaŭ sproby pieravarotu ŭ Čarnahoryi, Padhoryca, 16 kastryčnika. Fota: Stevo Vasiljevic / Reuters / Scanpix / LETA
Adznačajecca, što ŭ vieraśni 2016 hoda Šyrokaŭ i Papoŭ arhanizavali na terytoryi Čarnahoryi, Sierbii i Rasii hrupu dla ździajśnieńnia «niavyznačanaj kolkaści teraktaŭ i zamachu na pradstaŭnikoŭ uład Čarnahoryi», piša Meduza.
Rasijanie, jak paviedamlajecca, daručyli viarboŭku udzielnikaŭ pieravarotu Alaksandru Sindželiču — sierbskamu nacyjanalistu, jaki vajavaŭ u Danbasie na baku prarasijskich sieparatystaŭ. Arhanizatary vydatkavali 30 tysiač jeŭra, kab zakupić 50 aŭtamatyčnych vintovak i patrony da ich, jakija zmoŭščyki płanavali vykarystać dla zachopu ŭłady. Ahułam, jak śćviardžajecca, Sindželič atrymaŭ ad rasijan 200 tysiač jeŭra dla arhanizacyi pieravarotu.
Usiaho ŭ paviedamleńni pryvodziacca imiony 19 sierbaŭ i čarnahorcaŭ, jakija, pa viersii śledstva, udzielničali ŭ zmovie.
Raniej čarnahorskaja prakuratura zajaviła, što «rasijskija nacyjanalisty» płanavali zachapić uładu ŭ krainie ŭ dzień parłamienckich vybaraŭ 16 kastryčnika. Śćviardžałasia, što zmoŭščyki chacieli zabić premjer-ministra krainy Miła Džukanaviča.
Pieravarot, pa viersii śledstva, byŭ spłanavany, kab nie dapuścić ustupleńnia Čarnahoryi ŭ NATA.
Imiony rasijan pry hetym nie nazyvalisia, ale ŭ prakuratury adznačyli, što jany zmahli bieśpieraškodna pakinuć Sierbiju.
Čytajcie taksama: