Biełarus pieramoh u samym epatažnym šou rasijskaha internetu i zarabiŭ $50 tysiač
26-hadovy žychar Minska Viktar Kasaŭcaŭ staŭ pieramožcam realici-šou «Pabličnyja hulni», jakoje prachodziła na bazie płatformy sacyjalnaj sietki «Ukantakcie». Kasaŭcaŭ vyjhraŭ 3 miljony rasijskich rubloŭ, heta krychu bolej za 50 tysiač dalaraŭ.
Dla pieramohi Kasaŭcaŭ čatyrnaccać hadzin adstajaŭ na słupie ŭ mory. «Ja jašče nie vieru, što pieramoh. Ja na kožnaje vyprabavańnie vychodziŭ i rvaŭ siabie», — skazaŭ jon, pakazaŭšy šnary pa ŭsim ciele.
Kudy Kasaŭcaŭ patracić hrošy? «Ja narešcie razdam usie svaje pazyki, ja narešcie zajmusia niejkim biznesam. Bo pracavać na najmie ŭ Minsku za kapiejki mianie nie natchniaje. I nikoli nie natchniała, ja nidzie bolš za paŭhoda nie pracavaŭ». Viktar ciapier robić inžynieram pa raźmierkavańni.
«Pabličnyja hulni» — heta realici-šou, jakoje tranślavałasia anłajn kruhłasutačna na praciahu dvuch miesiacaŭ. «Pabličnyja hulni» adroźnivalisia ad «Doma-2» ci «Apošniaha hieroja» vialikaj kolkaściu maciukoŭ i trešu, chapała aholenaści. Toj ža Kasaŭcaŭ zaśviaciŭsia ŭ efiry całkam hoły. A taksama ŭdzielnikaŭ čakali vyprabavańni, chto ź im nie spraŭlaŭsia, ci davaŭ zanadta mała kantentu, pakidaŭ šou.
Kasaŭcaŭ uvieś čas padkreślivaŭ, što jon ź Biełarusi, nasiŭ admysłovyja majki. Dziela dziesiaci rułonaŭ tualetnaj papiery Kasaŭcaŭ usiu noč stajaŭ pierad botam, što viadzie šou. Da jaho padyšła inšaja ŭdzielnica, Viktar skazaŭ pa-rusku: «Ja kašulu naciahnu na hałavu». Pry hetym jaho spadarožnica źviarnuła ŭvahu na ciekańnie, ułaścivaje biełaruskaj movie. «Nacianu? Cha-cha, biełarus», — adreahavała jana.