U Krymie FSB praviała pieratrusy ŭ krymskatatarskich aktyvistaŭ
Rasijskaja FSB ranicaj 30 krasavika praviała niekalki pieratrusaŭ u krymskatatarskich aktyvistaŭ u aneksavanym Krymie. Pra heta paviedamlaje ŭ Facebook «Krymskaja salidarnaść».
«6.15 ranicy. Pa paviedamleńni namieśnika kiraŭnika Miedžlisa Narymana Džalała ŭ domie krymskatatarskaha aktyvista Rałana Asmanava adbyvajecca pieratrus. 6.30 ranicy. Paviedamlajuć pra śledčyja mierapryjemstvy ŭ jašče adnym domie krymskaha tataryna Dzilaviera Biekirava, jaki pražyvaje ŭ s. Žyvapisnaje, vuł. Zahorskaja», — havorycca ŭ paviedamleńni.
Praź niekatory čas tam paviedamili, što pieratrusy zaviaršylisia. Nikoha z aktyvistaŭ nie zatrymali i nie abmiežavali ich svabodu. Sami ž rasijskija siłaviki paviedamili Asmanavu, što nibyta šukali narkotyki.
27 sakavika ŭ Krymie pravodzilisia pieratrusy pa mienšaj miery ŭ 25 damach krymskich tatar. Aficyjna FSB pravodziła pieratrusy ŭ pošukach členaŭ zabaronienaj u Rasii isłamisckaj arhanizacyi «Chizb ut-Tachryr». Pravaabaroncy kažuć, što heta była samaja maštabnaja abłava ŭ Krymie z momantu akupacyi.