U Biełaruś jedzie Valancina Maćvijenka
Aficyjny vizit u Biełaruś delehacyi rasijskaha Savieta Fiederacyi na čale sa śpikieram Valancinaj Maćvijenka projdzie 5-6 sakavika, paviedamlaje BiełTA.
5 sakavika z Maćvijenka sustreniecca staršynia Savieta Respubliki Natalla Kačanava. Pieramovy projduć u vuzkim i pašyranym farmatach. U hety ž dzień śpikiery vierchnich pałat parłamientaŭ prymuć udzieł u pasiadžeńni arhkamiteta pa padrychtoŭcy i praviadzieńniu VII Forumu rehijonaŭ Biełarusi i Rasii. Akramia taho, zapłanavana sustreča Valanciny Maćvijenka z staršynioj Pałaty pradstaŭnikoŭ Uładzimiram Andrejčankam.
Valancina Maćvijenka ŭskładzie vianok da steły «Minsk — horad-hieroj», a taksama prymie ŭdzieł u cyrymonii pieradačy ziamli ŭ kapsule ź miescaŭ pachavańnia savieckich sałdat pad Rževam Chramu-pomniku ŭ honar Usich Śviatych, a 6 sakavika Maćvijenka i Natalla Kačanava naviedajuć miemaryjalny kompleks «Bresckaja krepaść-hieroj».