Žurfak sioleta nie nabiraŭ na płatnaje. Usich rychtujuć dla dziaržaŭnych ŚMI
Dekan fakulteta žurnalistyki BDU kandydat histaryčnych navuk Alaksiej Bialajeŭ raspavioŭ BiełTA, jak sioleta prajšła pryjomnaja kampanija na fakultecie.
Fota: «Naša Niva»
«Trochi raniej u nas adbyłosia zaličeńnie na śpiecyjalnaść «infarmacyja i kamunikacyja», prachadny bał tam byŭ dastatkova vysoki — 369. Sioleta my zaličyli 22 abituryjenty. U piatnicu ŭ nas prajšło sumoŭje dla zaličeńnia na śpiecyjalnaść «žurnalistyka». Sioleta my trochi źmianili nabor, jon u nas adnosna nievialiki — usiaho 60 biudžetnych miescaŭ, i nabirajem studentaŭ užo pa sutnaści na novuju śpiecyjalnaść.
My aptymizavali navučalny płan i stvaryli adnu ŭniviersalnuju śpiecyjalnaść «žurnalist». Tamu ŭsie 60 čałaviek buduć žurnalistami, jakija atrymajuć prykładna adnolkavuju bazavuju adukacyju. Na starejšych kursach jany zmohuć prajści prafilizacyju i skancentravacca na vyvučeńni najbolš cikavych im pradmietaŭ: kahości zacikavić spartyŭnaja žurnalistyka, kahości — ekanomika, palityka ci kultura, mastactva», — raspavioŭ Alaksiej Bialajeŭ.
Na 60 biudžetnych miescaŭ sioleta było padadziena 79 zajaŭ. Pavodle Bialajeva skłaŭsia dosyć vysoki prachadny bał — 340 (z ulikam dvuch siertyfikataŭ CE, atestata i dvuch unutranych tvorčych vyprabavańniaŭ).
«Mnohija z abituryjentaŭ atrymali značna vyšej za 400 bałaŭ, jość i tyja, chto pastupiŭ z vynikam 475 bałaŭ. Usie abituryjenty prachodzili śpiecyjalny ŭnutrany ekzamien pa tvorčaści, jaki składaŭsia ź niekalkich častak. Jany pisali tvorčaje sačynieńnie, zdavali vusnaje testavańnie, dzie adkazvali na peŭnyja pytańni i pravodzili pracu nad pamyłkami pa ruskaj movie, taksama abituryjenty pradstaŭlali svajo partfolia», — raspavioŭ kiraŭnik fakulteta.
Što tyčycca adsutnaści ŭ hetym hodzie naboru na płatnaje adździaleńnie, Alaksiej Bialajeŭ padkreśliŭ, što pakul u hetym niama patreby.
«Heta vyklikana, pa-pieršaje, zapytam z boku dziaržaŭnych ŚMI. Jość surjoznaja nieabchodnaść papaŭniać kadry dziaržaŭnych srodkaŭ masavaj infarmacyi, i heta nie tolki centralnyja ŚMI, ale i rehijanalnyja. Tamu my vykonvajem zadaču dziaržaŭnaha zakazu pa papaŭnieńni žurnalisckimi kadrami ŭ pieršuju čarhu dziaržaŭnych arhanizacyj, ustanoŭ, srodkaŭ masavaj infarmacyi, redakcyj. Kali ŭ dalejšym my ŭbačym bolš šyrokaje pole pracy dla žurnalistaŭ, to, viadoma, možam adnavić płatnyja nabory, ale ŭ najbližejšaj pierśpiektyvie pakul u hetym nie majem patrebu», — prainfarmavaŭ jon.
Nahadajem, što za try hady represij niezaležnaja žurnalistyka ŭ Biełarusi amal źniščana, za kratami znachodzicca 35 supracoŭnikaŭ ŚMI i žurnalistaŭ. Niekatoryja, jak, naprykład, hałoŭnaja redaktarka Tut.by Maryna Zołatava i hiendyrektarka partała Ludmiła Čekina, fryłansier Ihar Łosik, błohier Eduard Palčys, žurnalist Dzianis Ivašyn, miedyjamieniedžar Andrej Alaksandraŭ pryhavoranyja da nialudskich terminaŭ.