Milicyja vypadkova vykłała ŭnutrany dakumient z analizam miedyja. Voś kaho jany siońnia čytali i jakija ŚMI ličać niezaležnymi

Niechta ź siłavikoŭ pamyłkova zapościŭ svaju spravazdaču ŭ kanał «50 adcieńniaŭ praŭdy/chłuśni».

Kanał «50 adcieńniaŭ praŭdy/chłuśni» źjaviŭsia ŭ lipieni 2020 hoda i palivaŭ brudam Siarhieja Cichanoŭskaha i abjadnany štab apazicyi, u jaki tady ŭvachodziła Śviatłana Cichanoŭskaja. Čas ad času tam źjaŭlajucca «insajdy» kštałtu asabistych pierapisak, jakija mohuć być tolki ŭ siłavikoŭ.

U apublikavanym i adrazu ž vydalenym dakumiencie «ahlad ŚMI pa stanie na 16:00 23.01.2025» krynicy infarmacyi raźbityja na try hrupy. Heta «niezaležny paradak dnia», «dziaržaŭny paradak dnia», a taksama raździeł «U adnosinach da elektaralnaj kampanii».

U niezaležnych za siońnia byli nastupnyja naviny:

• Blizko.by z temaj pra toje, što minčanie mohuć paskardzicca na zavyšeńnie cen abo niedachop tavaraŭ,
• navina z telehram-kanała «Basta» pra toje, što tavarnyja znaki «Buślika» buduć pradavać,
• telehram-kanał «Minsk. Hałoŭnaje!» z navinaj pra jaŭku padčas daterminovaha hałasavańnia,
• Digital Intelligence Team z navinaj pra balnicu KDB za 16 miljonaŭ dalaraŭ,
• telehram-kanał Blizko.by z navinaj pra toje, što kandydat-spojler Syrankoŭ prapanuje zamianić pasadu prezidenta na pasadu staršyni,
• kanał US Today/Sojediniennyje Štaty Siehodnia pra toje, što ŭ Bostanie pabačyli płakaty ŭ padtrymku Łukašenki,
• REFORM.news z navinaj pra ŭciečku azota z trubapravoda,
• EX-PRESS.LIVE za navinaj pra drennuju churmu z kramaŭ.

U dziaržaŭnaha paradku dnia:

• telehram kanał «Puł pieršaha» z navinaj pra dziaržaŭnyja znaki jakaści ad Łukašenki,
• telehram-kanał Minharvykankama z navinoj pra Noč adkryćciaŭ u nacyjanalnaj biblijatecy dy navinoj pra «Marafon adzinstva»,
• telehram-kanał Biełaruskaha dziaržaŭnaha ŭniviersiteta z navinoj pra toje, što ministr adukacyi Ivaniec sustreŭsia z rektaram, supracoŭnikami dy studentami BDU,
• rasijski sajt Sputnik Biełaruś, jaki napisaŭ pra toje, što cełych 15 biełarusaŭ pryjechali prahałasavać z-za miažy.

U adnosinach da elektaralnaj kampanii adznačanaja siońniašniaja fejkavaja rassyłka HUBAZiKa (vidać, pres-słužba nie ŭdzielničaje ŭ takich apieracyjach i tamu nie viedaje, što heta praca samich siłavikoŭ). Taksama adznačanyja dva kamientary z telehram-čataŭ:

• kamientar karystalnika ŭ čacie «Uručča»: «Niadobranadziejnaje spadarstva, a da niekaha ŭžo prychodzili mianty dla prafiłaktyčnaj hutarki pierad vybarami? Da mianie rankam pryjšli, praŭda, nie zastali. Daviałosia vyzvońvać mianie i nastojliva prasić sustrečy. Pahadziŭsia padjechać da ich u Pieršamajski RAUS».
• i kamientar u čacie «Minsk mir čat»: «Abaviazkova prahałasujcie, a to Saniečka vaš ulublony nie pieramoža na vybarach».

U cełym, ahlad ŚMI składzieny davoli akuratna. Pa ŭsim vidać, što robicca jon nie dla prapahandy, a dla taho, kab kiraŭnictva MUS atrymlivała ahlad taho, što pišuć.

Kamientary da artykuła