Milicyja vypadkova apublikavała VIDEA dla ŭnutranaha karystańnia — instrukcyju, jak treba pavodzić siabie z nasielnictvam
Na videa hrodzienskaha MUS pakazana, jak pavinien i nie pavinien pavodzić siabie supracoŭnik milicyi ŭ roznych vypadkach. Rolu «chulihana» ŭ roliku hraje staršy inśpiektar adździaleńnia infarmacyi i hramadskich suviaziaŭ Maksim Bazylenka, a rolu ŭčastkovaha — milicyjanier Pavieł Łukaševič.
Pra što videa?
11 śniežnia ŭ kanale hrodzienskaj milicyi źjaviłasia i było adrazu vydalenaje videa, zroblenaje dla ŭnutranaha karystańnia supracoŭnikaŭ milicyi.
Siužet rolika taki: adzin čałaviek siadzić na łaŭcy i pje piva, a ŭčastkovy padychodzić da jaho i choča vyśvietlić adnosiny.
Učastkovy adrazu pačynaje pavodzić siabie dziorzka, ale videa raptam čyrvanieje i vyłazić nadpis «niapravilna».
Zakadravy hołas tłumačyć, što milicyjant «musić vykonvać praviły etykietu, razmaŭlać vietliva, pradstavicca i zapytacca, jak možna źviartacca da čałavieka, źviartacca na «vy». Źnižeńniu ahresiŭnaści spryjajuć: ustanaŭleńnie kantaktu vačej, zvarot pa imieni i imieni pa baćku, dobrazyčlivy vyraz tvaru. Pry hetym varta trymać dystancyju ŭ razmovie, kab nie parušać asabistych miežaŭ hramadzian, bo heta moža ich razdražniać».
Dalej milicyjant pradstaŭlajecca jak naležyć i sprabuje vyśvietlić, čamu mužčyna vypivaje ŭ try hadziny dnia. Pravaparušalnik, rolu jakoha hraje Maksim Bazylenka, stasujecca ź milicyjantam vyklučna na «ty». U adkaz milicyjant znoŭ pačynaje hrubić. Zakadravy hołas kaža:
«Nie dapuskajcie napadkaŭ, abrazaŭ abo pahrozaŭ u dačynieńni da hramadzianina. Varta ŭvažliva vysłuchać dovady hramadzianina adnosna ździejśnienaha pravaparušeńnia, asabliva kali jon va ŭzbudžanym stanie».
Hetym razam milicyjant spakojna kaža, što hramadzianin parušaje zakony marali. Praŭda, dalej, u adkaz na hrubaść, znoŭku zryvajecca i pahražaje dadatkovym artykułam. Zakadravy hołas vučyć, što milicyjantam varta sačyć za svaim emacyjnym stanam dy razmaŭlać spakojna.
Dalej mužčyna prapanuje «razyścisia». U adkaz milicyjant kaža, što tak nie atrymajecca — zakadravy hołas kaža, što tak i treba:
«Nie idzicie na pavadku ŭ pravaparušalnika. Pamiatajcie, što vaša siła — u viedańni svajoj spravy, prafiesijnym majsterstvie i ŭmieńni pierakonvać. Chaj parušalnik adčuje heta pa pavodzinach supracoŭnika ŭnutranych spravaŭ».
Paśla hetaha milicyjant sprabuje zatrymać čałavieka, a toj kaža, što «ŭsio zdymie na telefon» i dastaje smartfon. Paśla hetaha milicyjant pačynaje isteryć i sprabuje zakryć telefon rukami, a na ekranie ŭ čarhovy raz źjaŭlajecca nadpis «niapravilna».
«Pry stasunkach z hramadzianami varta paźbiahać słovaŭ, jakija raspalvajuć kanflikt. Nie vykarystoŭvajcie słovy «supakojciesia», «nie nakalajcie stanovišča», «nie kryčycie», «nie niervujciesia» i hetak dalej. Zamiest hetaha kažycie: «davajcie supakoimsia, my ž z vami razumnyja ludzi i znojdziem vychad ź situacyi» abo «vy ž razumny čałaviek i musicie razumieć, što svaimi dziejańniami parušajecie paradak», — vučyć videa.
Paśla hetaha milicyjant kaža, što «nie maje paŭnamoctvaŭ kamientavać svaje dziejańni». Zakadravy hołas vučyć, što varta trymacca hodna i hladzieć na surazmoŭcu.
Dziela taho, kab było ciažej zdymać milicyjanta, videa vučyć «niaśpiešna mianiać svajo stanovišča ŭ prastory, kab składaniej było sfakusavacca na vašym tvary».
«Zachoŭvajcie ŭnutrany spakoj. Navat kali vy ličycie, što vam zadajuć pravakatyŭnyja pytańni, nie hublajcie samavałodańnia. Vaša razdražnieńnie adnosna subiasiednika vykliča ŭsplosk niepryniaćcia vas siarod hledačoŭ», — vučyć zakadravy hołas.
Dalej milicyjant kaža, što budzie składać pratakoł. Videa vučyć, što varta rabić heta ŭpeŭniena, i tłumačyć, što pratakoł składajecca nie praz žadańnie milicyjanta, a praz patrabavańnie zakona.
U apošniaj častcy milicyjant adrazu ciahnie mužčynu ŭ adździaleńnie. Paśla nadpisu «niapravilna» zakadravy hołas kaža, što treba być spakojnym i nie davać pravaparušalniku adciahnuć uvahu ad faktu parušeńnia zakona. Treba viartać razmovu ŭ pravavoje pole i tłumačyć, što mienavita čałaviek parušyŭ.
U vypadku niepadparadkavańnia možna «ŭžyć miery administratyŭnaha prymusu».
Chto hraje ŭ videa?
Maksimu Bazylenka 31 hod. Jon z Hrodna. Vučyŭsia ŭ Hrodzienskim dziaržaŭnym univiersitecie na žurnalista. U rejtynhavaj viedamaści za 6 siemiestr 3 kursa jon zajmaŭ 1498-je miesca z 1528 studentaŭ i maje rejtynh 2.43 z 10.
Bazylenka paśla vypusku ŭ 2015 hodzie pracavaŭ u milicyi. Spačatku jon pisaŭ naviny dla sajta i sacsietak, ciapier ža čaściakom taksama kamientuje padziei dla dziaržaŭnych miedyja. Jahonaja pasada — staršy inśpiektar adździaleńnia infarmacyi i hramadskich suviaziaŭ UUS Hrodzienskaha abłvykankama, jon maje zvańnie staršaha lejtenanta.
Rolu ŭčastkovaha (z pravaha boku) hraje Pavieł Łukaševič — milicyjant z Hrodna. Jon skončyŭ Hrodzienski dziaržaŭny ŭniviersitet pa śpiecyjalnaści «psichałohija» ŭ 2021 hodzie. Va ŭniviersitecie jon byŭ sieradniakom: u rejtynhavaj viedamaści za 2018 hod Łukaševič na 1323 miescy z 2102-ch z bałam 6.75.
Ad hetaha času pracuje ŭ milicyi, u telefonnych knihach inšych zapisany jak «učastkovy Parečča» i «Pavieł UUS». U sacsietkach cikavicca zarobkam na kryptavalutach.
«Naša Niva» — bastyjon biełaruščyny
PADTRYMAĆMilicyja vypadkova apublikavała VIDEA dla ŭnutranaha karystańnia — instrukcyju, jak treba pavodzić siabie z nasielnictvam4
Kamientary