Biełarusa-emihranta ŭklučyli ŭ ekstremisckaje farmiravańnie «Rasija — heta zło». A jon usio adno viarnuŭsia z Polščy dadomu

Rusłanu Zubkovu ciapier pahražaje da šaści hadoŭ kałonii.

Rusłan Zubkoŭ. Fota ź jahonaj staronki Ukantakcie

Rusłanu Zubkovu 26 hadoŭ. Jon rodam z horada Vysokaje Kamianieckaha rajona — samaha zachodniaha horada Biełarusi. Paśla škoły advučyŭsia na ślesara-zvarščyka ŭ ahrarnym kaledžy ŭ rodnym horadzie. Paśla pierajechaŭ u Brest, u 2019 niejki čas pracavaŭ rabočym u Rasii.

Miarkujučy pa sacsietkach, Rusłan u apošnija hady žyŭ i pracavaŭ u Polščy. Jon lubić padarožničać, a ŭ lipieni 2023 šukaŭ pracu roznarabočym u Krakavie abo vakolicach. Apošni raz jon abnaŭlaŭ sacsietki ŭ vieraśni 2023 hoda.

U śniežni 2023 hoda Zubkova ŭnieśli ŭ śpis udzielnikaŭ ekstremisckaha farmiravańnia «Rasija — heta zło». Heta nievialiki telehram-čat na 135 čałaviek, dzie aktyŭnyja ciapier tolki try čałavieki.

Miarkujučy pa ŭsim, heta źviazana z tym, što Rusłan mieŭ drenna abaronieny telehram-akaŭnt. U takim vypadku jon, na žal, nijak nie moh abaranicca postfaktum — navat kali b vydaliŭ telehram-akaŭnt.

Kali i čamu Zubkoŭ viarnuŭsia ŭ Biełaruś — zahadka. Mahčyma, jon prosta nie viedaŭ pra toje, što jaho ŭklučyli ŭ śpis udzielnikaŭ ekstremisckaha farmiravańnia.

U lutym 2024 hoda Rusłana abjaŭlali ŭ vyšuk na terytoryi Biełarusi i Rasii — heta značyć, što na toj momant jon jašče byŭ na svabodzie.

Kali Rusłan byŭ zatrymany — taksama nieviadoma. U pieršy raz jaho sudzili ŭ červieni 2024 hoda za «abrazu Łukašenki» ŭ Kamianieckim rajonnym sudzie. Prysud nieviadomy.

Ciapier Zubkova pačynajuć sudzić znoŭ. Praces pačniecca 10 lutaha 2025 hoda ŭ Bresckim abłasnym sudzie. Chłopca abvinavačvajuć pa dvuch artykułach — «sadziejničańnie ekstremisckaj dziejnaści» (č. 1 art. 361-4 KK) i «abraza Łukašenki» (č. 1 art. 368 KK). Jamu pahražaje da šaści hadoŭ kałonii.

Kamientary da artykuła