«Dzień, jakoha mnohija čakali». Zasnavalnik EPAM adreahavaŭ na vyzvaleńnie 123‑ch palitviaźniaŭ
«Siońnia byŭ dzień, jakoha mnohija čakali. Hłybokaja ŭdziačnaść Krystafieru U. Śmitu za namahańni, nastojlivaść i razvažlivaść, jakaja staić za hetym. Dziakuj», — napisaŭ zasnavalnik EPAM Arkadź Dobkin u sacyjalnaj sietcy LinkedIn paśla taho, jak 13 śniežnia stała viadoma pra vyzvaleńnie ź biełaruskich kałonij 123 palitviaźniaŭ. Na jahony dopis źviarnuŭ uvahu Devby.io.
Arkadź Dobkin. Fota: «Naša Niva»
Krystafier U. Śmit, jakomu padziakavaŭ Dobkin, — namieśnik pamočnika dziaržsakratara ZŠA va Uschodniaj Jeŭropie, a taksama ŭ pytańniach palityki i rehijanalnych spraŭ u Biuro pa spravach Jeŭropy i Jeŭrazii.
Da svajho dopisu Dobkin prykłaŭ spasyłku na staronku sajta Dziarždepartamienta ZŠA, jakaja prezientuje Krystafiera U. Śmita.
U subotu 13 śniežnia adbyŭsia novy i na siońnia samy maštabny etap vyzvaleńnia biełaruskich palitviaźniaŭ — paśla vizitu ŭ Minsk delehacyi ZŠA na čale sa śpiecpradstaŭnikom Džonam Koŭłam i abviaščeńnie ab źniaćci amierykanskich sankcyj ź biełaruskaha kaliju. Z turmy vyjšli 123 čałavieki — Viktar Babaryka, Maryja Kaleśnikava, Aleś Bialacki, Maksim Znak, Maryna Zołatava i mnohija inšyja znakavyja fihury.
Siarod vyzvalenych byli jak minimum čatyry biełaruskija ajcišniki:
- 39‑hadovy prahramist Alaksandr Jaškin z Hrodna. U pačatku 2024 hoda Hrodzienski abłasny sud prysudziŭ jaho da 4 hadoŭ kałonii ahulnaha režymu pavodle abvinavačvańnia za danaty, zakliki da zachopu ŭłady i h. d.
- 49‑hadovaja prahramistka Natalla Davydka, vypusknica Minskaha radyjotechničnaha instytuta, była zatrymanaja ŭ studzieni 2024 hoda, abvinavačanaja ŭ spryjańni ekstremisckaj dziejnaści dy inš., prysudžanaja da pazbaŭleńnia voli ŭ kałonii ahulnaha režymu.
- 34‑hadovaja prahramistka Nastaśsia Žylskaja. Pracavała ŭ Exadel, była zatrymanaja ŭ vieraśni 2024 hoda, abvinavačanaja ŭ zaklikach da sankcyj, raspalvańni varožaści dy inš. Pavodle artykułaŭ abvinavačvańnia mahła być asudžanaja na termin ad 4 da 12 hadoŭ.
- 37‑hadovy ajcišnik Viktar Mieka. Stvaraŭ kastamnyja hulni i mody dla Dota 2. Byŭ zatrymany ŭ lutym 2025 hoda, pavodle artykuła ab zaklikach da dziejańniaŭ suprać nacyjanalnaj biaśpieki asudžany na 2 hady kałonii ahulnaha režymu.
Akramia taho viadoma, što ŭ śpisie vyzvalenych čatyry supracoŭniki pradpryjemstva «Pielenh»: Karyna Prataščyk, Iryna Suržyk, Vadzim Žukoŭski i Siarhiej Zielanoŭski.
Čytajcie taksama:
Poŭny śpis palitviaźniaŭ, vyzvalenych 13 śniežnia
Na palitviaźniaŭ užo sabrali ŭdvaja bolš za zapłanavanuju sumu. Zbor jašče možna padtrymać