Zialenski: ZŠA pieradaduć Rasii abnoŭleny mirny płan

Prezident Ukrainy Uładzimir Zialenski, jaki ciapier znachodzicca ź vizitam u Niderłandach, raskazaŭ pra nastupnyja kroki ŭ pieramovach ab miry.

Uładzimir Zialenski. Fota: Jonathan Raa / NurPhoto via Getty Images

Na sumiesnaj pres-kanfierencyi z premjer-ministram Niderłandaŭ Dzikam Schofam Zialenski paviedamiŭ, što ZŠA pieradaduć Rasii abnoŭleny mirny płan z 20 punktaŭ. Paśla adkazu Rasii amierykanski bok praviadzie novy raŭnd kansultacyj z Ukrainaj.

Raniej u Bierlinie Uładzimir Zialenski sustrakaŭsia sa śpiecyjalnym pasłańnikam Donalda Trampa Styvam Uitkafam i ziaciem prezidenta ZŠA Džaredam Kušnieram. Pa vynikach sustreč było abvieščana, što Vašynhton pahadziŭsia dać Ukrainie jurydyčna abaviazkovyja harantyi biaśpieki. Adnak asnoŭnaje pytańnie, terytaryjalnych sastupak, zastajecca niavyrašanym.

Rasija praciahvaje namahać na vyvadzie ŭkrainskich vojsk z usioj Danieckaj vobłaści, u tym liku z rajonaŭ, jakija jašče nie znachodziacca pad kantrolem rasijskich vojsk. Ukraina razhladaje takija patrabavańni jak nieprymalnyja.

Zielenski adznačyŭ, što paśla abmierkavańnia reakcyj amierykanski bok źviažacca z Rasijaj, a potym adbudziecca sustreča ŭ ZŠA na ŭzroŭni pieramoŭnych hrup. Jon taksama dadaŭ, što sam u hetych kansultacyjach udzielničać nie budzie. Mahčyma, novy raŭnd pieramoŭ projdzie ŭ Majami.

Akramia taho, prezident Ukrainy adznačyŭ, što siabroŭstva Ukrainy ŭ Jeŭrapiejskim sajuzie — važnaja častka harantyj biaśpieki.

Ukraina raźličvaje atrymać ad zachodnich sajuźnikaŭ 40—45 miljardaŭ dalaraŭ dapamohi ŭ 2026 hodzie i na ahulnuju sumu 210 miljardaŭ dalaraŭ (prykładnaja suma zamarožanych aktyvaŭ Rasii ŭ ES, jakija mohuć vykarystać dla finansavańnia Ukrainy).

U toj ža čas straty, naniesienyja vajnoj, pieravyšajuć 200 miljardaŭ dalaraŭ, a Jeŭropa havoryć pra ich kampiensacyju.

Kamientary da artykuła