Bieły dom pahražaje sudzić u ZŠA ekipaž zachoplenaha tankiera. Maskva paćvierdziła, što na borcie rasijanie
Situacyja vakoł zachopu tankiera Marinera (raniej Bella 1) nabyvaje ŭsio bolš surjozny abarot. Bieły dom aficyjna zajaviŭ pra hatoŭnaść vyvieźci ekipaž sudna ŭ Złučanyja Štaty dla suda. U svaju čarhu MZS Rasii paćvierdziła, što na borcie znachodziacca rasijskija hramadzianie.
Kadr zachopu tankiera Marinera
Pres-sakratarka Biełaha doma Kerałajn Levit na bryfinhu paviedamiła, što aryšt sudna byŭ praviedzieny Ministerstvam justycyi i Ministerstvam unutranaj biaśpieki ŭ kaardynacyi z vajskoŭcami. Jana paćvierdziła, što sudna było zatrymanaje ranicaj u Paŭnočnaj Atłantycy paśla praciahłaha adsočvańnia. Padstavaj staŭ ordar fiederalnaha suda ZŠA.
«Hety prezident nie budzie ciarpieć»
Pradstaŭnica Biełaha doma padkreśliła žorstkuju pazicyju novaj administracyi:
«Heta było sudna ź vieniesuelskaha cieniavoha fłotu, jakoje pieravoziła padsankcyjnuju naftu. I Złučanyja Štaty Amieryki za hetym Prezidentam nie buduć hetaha ciarpieć».
Asobna jana spyniłasia na losie marakoŭ. Pavodle słoŭ pres-sakratarki, sudovy ordar raspaŭsiudžvajecca nie tolki na sam tankier, ale i na ludziej.
«Heta aznačaje, što ekipaž ciapier padlahaje sudovamu pieraśledu za lubyja parušeńni fiederalnaha zakanadaŭstva. I ŭ vypadku nieabchodnaści jany buduć dastaŭlenyja ŭ Złučanyja Štaty dla takoha sudovaha razboru», — zajaviła Levit.
Vašynhton śćviardžaje, što sudna išło pad «falšyvym ściaham» i nie naležyć nijakaj krainie de-jure.
Reakcyja Maskvy i ŭdzieł Brytanii
MZS Rasii aficyjna paćvierdziła najaŭnaść rasijan na zachoplenym sudnie. Viedamstva patrabuje «niaŭchilna vykonvać pravy i intaresy rasijan na «Marynery» i nie pieraškadžać ich viartańniu na radzimu». Dypłamaty adznačyli, što ŭvažliva adsočvajuć paviedamleńni pra vysadku amierykancaŭ na bort.
Apieracyja zachopu prachodziła pry padtrymcy sajuźnikaŭ. Ministerstva abarony Vialikabrytanii paćvierdziła, što na prośbu ZŠA dała raźviedvalnyja źviestki i svaju infrastrukturu dla pierachopu parušalnika sankcyj.