U katastrofie An-26 u Krymie zahinuŭ hienierał

Telehram-kanał «Dośje špiona» paviedamiŭ, što na borcie samalota An-26, jaki 31 sakavika raźbiŭsia ŭ akupavanym rasijanami Krymie, siarod inšych zahinułych byŭ i hienierał.

Alaksandr Atroščanka

Pavodle infarmacyi telehram-kanała, siarod 29 čałaviek (23 pasažyry i 6 členaŭ ekipaža), jakija zahinuli ŭ avijakatastrofie An-26 31.03.2026, byŭ hienierał-lejtenant Alaksandr Atroščanka, kamandzir źmiešanaha avijacyjnaha korpusa Paŭnočnaha fłotu, były kamandujučy 45‑j armijaj VPS i SPA Paŭnočnaha fłotu.

Akramia jaho, zahinuli taksama 6 aficeraŭ štaba Paŭnočnaha fłotu (v/č 45625, Sievieramorsk).

Z pačatku poŭnamaštabnaj vajny Rasii suprać Ukrainy Alaksandr Atroščanka ŭžo 20‑ty zahinuły rasijski hienierał, kali ŭličvać straty jak na froncie, tak i ŭ tyle — u vyniku ŭdaraŭ pa štabach, avijaincydentaŭ, dyviersij i vybuchaŭ. 

Pavodle aficyjnych źviestak, jon naradziŭsia 21 sakavika 1962 hoda ŭ Staŭrapali. Paśla zakančeńnia vajskovaha avijacyjnaha vučylišča słužyŭ u avijacyi, pastupova prasoŭvajučysia pa słužbie — ad staršaha lotčyka da namieśnika kamandzira eskadrylli.

U 2005 hodzie jon z adznakaj skončyŭ Vajskovuju akademiju Hienieralnaha štaba. Z 2010 pa 2013 hod kiravaŭ marskoj avijacyjaj Čarnamorskaha fłotu Rasii, paśla čaho zaniaŭ anałahičnuju pasadu ŭ Paŭnočnym fłocie.

Z 2015 hoda Atroščanka kamandavaŭ 45‑j armijaj vajenna-pavietranych sił i supraćpavietranaj abarony Paŭnočnaha fłotu. U 2019 hodzie atrymaŭ zvańnie hienierał-lejtenanta, a ŭ 2024 hodzie staŭ kamandziram źmiešanaha avijacyjnaha korpusa hetaha fłotu.

Taksama viadoma, što ŭ 2014 hodzie jon udzielničaŭ u anieksii Kryma, a paźniej — u rasijskaj vajennaj apieracyi ŭ Siryi.

Incydent z samalotam An-26 nad akupavanym Krymam adbyŭsia 31 sakavika kala 18:00. Jak śćviardžajuć u viedamstvie, «źniščalnaha ŭździejańnia pa samalocie nie było», a papiaredniaj pryčynaj avaryi nazyvajecca techničnaja niaspraŭnaść. Minabarony aficyjna paviedamiła, što zahinuli 6 členaŭ ekipaža i 23 pasažyry. Samalot mierkavana ŭrezaŭsia ŭ skału.

Kamientary da artykuła