Na tarhi trapiła stohadovaja siadziba z kałonami i parkam. Jaje navat nie treba adnaŭlać

U malaŭničym miastečku ŭ Hrodzienskaj vobłaści pradajecca siadziba minułaha stahodździa. Pry hetym, u adroźnieńnie ad bolšaści padobnych pabudoŭ, dom nie maje patreby ŭ hłabalnym ramoncie. Apošnija hady tut raźmiaščaŭsia hatel i adpačyvali turysty. Ciapier dla kompleksu šukajuć novych haspadaroŭ. Tarhi za dom ź vialikim učastkam projduć na placoŭcy «BUTB-Majomaść», piša Realt.by.

Baza adpačynku raźmiaściłasia na ŭskrainie horada Masty, na vulicy Janki Kupały, 62. Niepadalok znachodzicca čyhunačnaja stancyja. Adlehłaść da Minska — kala 240 kiłamietraŭ, adlehłaść da Hrodna — 60 kiłamietraŭ.

Kamienny dom z mansardaj, kłasičnym fasadam i kałonami pabudavali ŭ 1920‑ia hady ŭ papularnym tady zakapanskim styli. Navokał majontka zakłali sad i pasadzili nievialiki akuratny park, frahmienty jakoha častkova paznajucca i siońnia.

Paśla dałučeńnia Zachodniaj Biełarusi da SSSR u budynku adkryłasia siaredniaja škoła, a ŭžo ŭ našy dni tut raźmiaściłasia ahrasiadziba «Javar» z bankietnaj załaj. Jana pracavała pad kiraŭnictvam miascovaha ŽKH.

Ahulnaja płošča cahlanaha budynka naličvaje kala 270 kvadratnych mietraŭ. Akramia ahrasiadziby, u skład łota ŭvachodziać dźvie majsterni, altanka, kałodziež i ŭłasny tenisny kort. U kompleksie ŭžo jość usie kamunikacyi — elektrazabieśpiačeńnie, vodapravodnaja sietka i aŭtanomnaja kanalizacyja.

Siadziba zajmaje ziamielny nadzieł płoščaj kala 1,7 ha. Novy ŭłaśnik atrymaje hetu ziamlu ŭ arendu na 50 hadoŭ. Kompleks znachodzicca trochi ŭbaku ad horada, u spakojnym miescy. U samich Mastach praciakaje raka Nioman, a letaś tut paśla rekanstrukcyi adkryli samy doŭhi ŭ krainie padviesny piešachodny most sa šklanymi ŭstaŭkami.

Pačatkovy košt siadziby składaje 345 tysiač rubloŭ (120 tysiač dalaraŭ pa kursie Nacyjanalnaha banka). Tarhi projduć u elektronnym vyhladzie na placoŭcy «BUTB-Majomaść». Jany pryznačanyja na 25 žniŭnia.

Kamientary da artykuła