Pucin moža pasprabavać atakavać NATA ŭžo vosieńniu, ličyć raźviedka ZŠA
Ale abmiežavanaje suchaputnaje ŭvarvańnie ličać małavierahodnym.
Fota: Sefa Karacan/Anadolu via Getty Images
Novyja acenki raźviedki ZŠA pakazvajuć, što prezident Rasii Uładzimir Pucin moža pasprabavać pravieryć rašučaść NATA abmiežavanym udaram pa adnoj z krain aljansu ŭ bližejšyja niekalki hadoŭ — ad kibierataki da nievialikaha suchaputnaha ŭvarvańnia. Časavyja ramki — ad vosieni hetaha hoda da 2029 hoda, piša The Wall Street Journal.
Raniej ZŠA ličyli, što Pucin nie stanie pravakavać NATA, pakul praciahvajucca bajavyja dziejańni va Ukrainie. Ale heta acenka źmianiłasia: Pucin znachodzicca pad ciskam praź niaŭdačy na froncie, bo ŭkrainskija drony nanosiać usio bolšuju škodu armii i naftavaj halinie Rasii, i imkniecca dasiahnuć pieramohi.
ZŠA i jeŭrapiejskija sajuźniki ŭsio čaściej fiksujuć prykmiety probnych atak Rasii — naprykład, rasijskija kryłatyja rakiety zalatali ŭ Polšču, a drony — u Rumyniju.
Meta mahčymaj ataki na NATA, kali jana adbudziecca, — raskałoć aljans.
Najbolš niebiaśpiečny scenar — abmiežavanaje suchaputnaje ŭvarvańnie, ale jon ličycca małavierahodnym.
Paralelna jość zaniepakojenaść niastačaj krytyčna važnych bojeprypasaŭ u ZŠA — praz pastaŭki Ukrainie i kanflikt ź Iranam. Razmova idzie pra rakiety Precision Strike Missile, ATACMS, ZRK Stinger, a taksama sistemy SPA Patriot, SM-3, THAAD.
Pientahon i Bieły dom abviarhajuć śćviardžeńni pra niastaču bojeprypasaŭ, zajaŭlajučy, što ZŠA majuć «bolš čym dastatkova» ŭzbrajeńniaŭ dla metaŭ prezidenta Trampa.
Pavodle danych Centra stratehičnych i mižnarodnych daśledavańniaŭ (CSIS), u vajnie ź Iranam ZŠA vydatkavali 1060—1430 rakiet Patriot, pakinuŭšy ŭ reziervie kala 870 štuk — što vyklikaje tryvohu nakont mahčymaściej strymlivańnia adnačasova Rasii i Kitaja.