Ministr Ažubalis: Budaŭnictva AES azmročyć adnosiny na doŭhija hady

Kali Biełaruś pačnie budavać atamnuju elektrastancyju kala miežaŭ Litvy, to heta na dziasiatki hadoŭ azmročyć dvuchbakovyja adnosiny.

Pra heta zajaviŭ 13 maja na adkrytych słuchańniach u litoŭskim siejmie ministr zamiežnych spraŭ Litvy Aŭdronius Ažubalis, paviedamlaje internet-partał Delfi.

«U mianie, jak u hramadzianina Litvy i ministra zamiežnych spraŭ, vyklikaje zaniepakojenaść i zusim niezrazumiełaja hatoŭnaść Biełarusi pabudavać za 50 kiłamietraŭ ad litoŭskaj stalicy elektrastancyju, adnosna jakoj jość šmat pytańniaŭ biez adkazu», — skazaŭ ministr. Na jaho dumku, «hetaje rašeńnie Biełarusi, kali jano budzie realizoŭvacca, biez usiakich sumnieńniaŭ, mahu adkazna zajavić, na dziesiacihodździ azromčyć adnosiny Litvy i Biełarusi i akaža ŭpłyŭ na paradak dnia palityčnaha supracoŭnictva».

Ministr śćviardžaje, što ŭ jaho jość nadzieja, što «ciapierašniaje kiraŭnictva Biełarusi pačuje i našu cikavaść žyć u biaśpiečnym akružeńni». Źviartajučysia da pradstaŭnikoŭ biełaruskaj apazicyi i pradstaŭnikoŭ niaŭradavych arhanizacyj, Ažubalis zaznačyŭ, što pa hetym pytańni pavinna vykazacca i biełaruskaje hramadstva.

Internet-resurs nahadaŭ, što Litva krytykuje płany Biełarusi i Rasii budavać atamnyja elektrastancyi kala samaj miažy ź Litvoj. Palitykaŭ Litvy chvalujuć reaktary, jakija, pavodle ich śćviardžeńnia, dahetul realna nie vyprabavanyja. Dahetul zastajecca niazrazumiełym, čamu vybranyja placoŭki pobač ź miažoj, nie padrychtavanyja płany na vypadak avaryi, ihnarujucca pytańni biaśpieki.

Litva płanuje za 10 hadoŭ pabudavać atamnuju elektrastancyju ŭ Visahinasie. Pavodle płana, u prajekcie budzie brać udzieł bujnaja zamiežnaja kampanija, a taksama ŭrady troch krain Bałtyi i Polščy.

Kamientary da artykuła