Milicyja spyniła złačynnuju dziejnaść cyhan-kanakradaŭ
Jak paviedamiŭ supracoŭnik UUS Homielskaha abłvykankama Juryj Pilkievič, u Žłobinskim rajonie za kradziež koniej zatrymali miascovaha žychara, cyhana pa nacyjanalnaści. Jon pieršy kradziež kania ździejśniŭ u dalokim 1998 hodzie.
Pa słovach Pilkieviča, u Karmianski RAUS źviarnuŭsia žychar Lićvinavičaŭ, u jakoha prapaŭ koń. Kania abviaścili ŭ vyšuk. Praź niekatory čas padobnuju pavodle źniešnich prykmiet žyviolinku ŭhledzieli ajaskoŭcy Hadziłavičaŭ Rahačoŭskaha rajona. Vyśvietliłasia, što ździejśniŭ kradziež žychar vioski Čornaja Virnia Žłobinskaha rajona, raniej sudzimy za kanakradstva.
Koń žyŭ u ludziej, jakija ničoha nie padazravali pra kradziež. «Kradzienaha kania padazravany abmianiaŭ u adnoj ź viosak Rahačoŭskaha rajona, a ŭžo novaha pradaŭ u Rasiju», — udakładniŭ supracoŭnik UUS.
Pavodle jaho słoŭ, hety ž hramadzianin niekalki hadoŭ tamu ździejśniŭ na terytoryi Karmianskaha rajona piać kradziažoŭ koniej, za što i byŭ raniej pryciahnuty da kryminalnaj adkaznaści. Paru tydniaŭ tamu ŭ Žłobinskim rajonie za kradziež koniej i dvuch žarabiataŭ byŭ zatrymany i syn padazravanaha.