Rasija zajmieła novuju jadziernuju «Bułavu»

Vyprabavańni mižkantynientalnaj balistyčnaj rakiety zaviaršylisia.

Vyprabavańni mižkantynientalnaj balistyčnaj rakiety R-30 «Bułava» marskoha bazavańnia zaviaršylisia, i rakieta ciapier budzie pryniataja na ŭzbrajeńnie, zajaviŭ prezident Rasii Dźmitryj Miadźviedzieŭ.

23 śniežnia atamnaja padłodka «Juryj Daŭharuki» prajekta 955, dla jakoj i była stvoranaja «Bułava», zrabiła adnačasovy pusk dźviuch rakiet. Zvyčajna taki pusk zaviaršaje vyprabavańni.

Miadźviedzieŭ adznačyŭ, ito cykł vyprabavańniaŭ «prachodziŭ z peŭnymi prablemami». Majecca na ŭvazie cełaja sieryja niaŭdałych puskaŭ. Ad červienia 2004 hoda było praviedziena 18 zapuskaŭ «Bułavy». 11 ź ich byli pryznanyja całkam abo častkova paśpiachovymi. Avaryja «Bułavy» 9 śniežnia 2009 hoda pryviała da źjaŭleńnia ŭ niebie nad Paŭnočnaj Jeŭropaj niezrazumiełych ahnioŭ, jakija spačatku ździvili mietearołahaŭ, astranomaŭ i navat vajskoŭcaŭ.

«Bułavu» skanstrujavali ŭ Maskoŭskim instytucie ciepłatechniki, jaki taksama raspracavaŭ naziemnyja ćviordapaliŭnyja mižkantynientalnyja balistyčnyja rakiety «Jars» i «Tapola-M».

U siaredzinie 2009 hoda śpiecyjalisty vykazvali mierkavańnie, što rakietu naohuł nie ŭdasca davieści da vytvorčaści, i mierkavali, što na padłodki sieryi 955 pryjdziecca ŭstaloŭvać rakietu «Siniava».

Jana pryncypova adroźnivajecca ad «Bułavy» tym, što abstalavanaja vadkapaliŭnym reaktyŭnym ruchavikom, a nie ćviordapaliŭnym.

Ćviordapaliŭnyja («Bułava», «Tapola-M» i «Jars») mienš ŭraźlivyja dla srodkaŭ PRA. Vadkapaliŭnyja — składanyja ŭ absłuhoŭvańni i niebiaśpiečnyja, bo zapraŭleny vysokataksičnym palivam.

Mienavita hetaja asablivaść pryviała da hibieli 3 kastryčnika 1986 h. padvodnaj łodki K-219.

Śpiecyjalisty, jakija majuć dačynieńnie da rasijskich stratehičnych jadziernych siłaŭ, adznačajuć, što «Bułava» nie źjaŭlajecca paŭnavartasnaj alternatyvaj vadkapaliŭnym rakietam.

Pa-pieršaje, z-za zanadta małoj adkidnoj vahi, a pa-druhoje, u jaje marskim varyjancie, — z-za davoli vialikaj kolkaści niaŭdałych puskaŭ.

U žniŭni 2011 stała viadoma, što

ŭ Rasii raspracoŭvajecca novaja marskaja balistyčnaja rakieta na vadkim palivie, jakaja pryjdzie na źmienu «Siniavie».

Dziaržaŭny rakietny centr imia Makiejeva, abviaściŭšy ab hetaj raspracoŭcy, zhadaŭ jaje nazvu — «Łajnier».

U kancy listapada prezident Dźmitryj Miadźviedzieŭ, robiačy aficyjnuju zajavu ab tym, jak Rasija budzie reahavać na adsutnaść prahresu na pieramovach z ZŠA pa pytańni procirakietnaj abarony, siarod inšych mieraŭ nazvaŭ i madernizacyju stratehičnych jadziernych siłaŭ.

Ekśpierty ličać, što Rasija pačnie ŭkładaać bolš srodkaŭ u raspracoŭku novych mižkantynientalnych balistyčnych rakiet i ich madernizacyju. Na ich dumku, heta pierš za ŭsio tyčycca rakiet «Jars».

Inšyja ekśpierty taksama adznačajuć važnaść budaŭnictva mienavita ćviordapaliŭnych rakiet, jak mienš uraźlivych na pačatkovym etapie trajektoryi palotu.

Kamientary da artykuła