Čarhovaje DTZ ź biełarusami va Ukrainie

Paciarpieli 5 čałaviek.

Piaciora hramadzian Biełarusi paciarpieli ŭ darožna-transpartnym zdareńni va Ukrainie. DTZ adbyłosia u 5.30 ranicy 19 žniŭnia ŭ rajonie Hałavanaŭska Kiravahradskaj vobłaści na aŭtadarozie Uljanaŭka — Mikałajeŭ.

U vyniku sutyknieńnia dźviuch lehkavych aŭtamabilaŭ adzin ź ich zahareŭsia. Pažar byŭ likvidavany ciaham paŭhadziny padraździaleńniem pažarna-vyratavalnaj słužby rajonnaha adździaleńnia MNS.

Paciarpiełyja ŭ avaryi biełaruskija hramadzianie z traŭmami roznych stupieniaŭ ciažkaści byli špitalizavany ŭ miascovuju balnicu.

Heta nie pieršaje maštabnaje DTZ z udziełam biełaruskich hramadzian va Ukrainie.

Tak, 21 lipienia ŭ Chiersonskaj vobłaści na 105-m km aŭtadarohi Simfieropal — Chierson aŭtobus ź Biełarusi sutyknuŭsia ŭ łabavuju ź mikraaŭtobusam i pierakuliŭsia. U avaryi paciarpieli 43 hramadzianiny Biełarusi, jakija viartalisia z adpačynku ŭ Krymie.

11 žniŭnia ŭ Mikałajeŭskaj vobłaści 38-hadovy žychar Minskaj vobłaści, kiroŭca pasažyrskaha mikraaŭtobusa Ford Transit, pa nieviadomych pryčynach vyjechaŭ na pałasu sustrečnaha ruchu, dzie sutyknuŭsia z tryma lehkavymi aŭtamabilami. U DTZ paciarpieli troje biełarusaŭ, piaciora hramadzian Rasii i piaciora ŭkraincaŭ. Atrymali traŭmy roznych stupieniaŭ ciažkaści 13 čałaviek, ź ich 8 dziaciej ad troch da čatyrnaccaci hadoŭ.

Kamientary da artykuła