Sport

 Sport

Nadziarem usich!

Chakiejnaja družyna dobra raźmiałasia na mižnarodnym turniry
ŭ Słavaččynie

Supiernikami našych u karpackim Trenčynie byli haspadary – vice-čempijony śvietu, švajcarcy dy narviežcy. Našy prajhrali słavakam 0:1, zhulali ŭničyju z švajcarcami 1:1 dy na raźvitańnie zrabili narveskuju adbiŭnuju pa-biełarusku – 4:1!

Praz paŭtara miesiaca našuju kamandu čakaje adbor na Alimpijadu ŭ Sołt-Lejk-Sici'2002. Kab zabić sabie miesca na amerykanskim lodzie, tre budzie 8—11 lutaha ŭ Osła strecca ź niemcami, ukraincami dy narvežcami i spakojnieńka znajści adnaho lišniaha. Astatnija troje zmohuć śnić dalokaje Salonaje voziera.

Čempijanat śvietu pačniecca pry kancy krasavika ŭ Niamieččynie. Na papiarednim etapie biełarusy buduć hulać u adnoj abojmie z čechami, niemcami dy švajcarcami. Da viasny jašče – da Pieruna času, a vo našaj moładzievaj bryhadzie zastałosia kala tydnia da pačatku čempijanatu śvietu ŭ hrupie A, jaki pačniecca ŭ Maskvie dy Padolsku ŭ II-m tysiačahodździ, a skončycca ŭžo ŭ III-m. Tam my pazmahajemsia z haspadarami, kanadcami, švajcarcami dy finami. Supierniki — na luby hust, dy ŭsich ich treba drać. Miž inšym, dziela razahrevu pierad vizytam u Maskoviju biełarusy ŭ Miensku zhulajuć dva matčy z admysłovaj zbornaj rasiejskaj stalicy.

Najmałodšaja ž zbornaja – junijorskaja — uviesnu padnatužycca ŭ pieršym dyvizyjonie čempijanatu śvietu, kab viarnuć Biełaruś u elitu. Hańba, kali zamiest nas tudy ŭskočać datčanie, japoncy ci karejcy. Usie chakiejnyja kamandy buduć brać prykład ź bijatlanista Sašuryna, jaki na hetym tydni vyjhraŭ pieršy biełaruski medal u sezonie.

Bahdan Arłoŭ