Tak pierajaždžaje «BiełAZam»

Žodzinskaje «Tarpeda» zachavała za saboj pieršaje miesca, adkinuŭšy «Darydu» na šostaje. Pavodle antrapametryčnych danych maładyja ždanoŭskija futbalisty jaŭna sastupajuć fakturnym biełazaŭcam.

Repartaž Aleha Rajaŭca.

Hałoŭny matč turu futbolnaha čempijanatu prachodziŭ u Kuncaŭščynie. Na tamtejšym stadyjonie pravodzić chatnija pajadynki ždanovickaja «Daryda». Kamanda tolki treci sezon pravodzić u vyšejšaj lizie: pazaletaś jana była trynaccataj, u 2004 h. zaniała 11-je miesca. Sioleta paśla čatyroch turaŭ «Daryda» išła treciaj, majučy «nul» u hrafie paražeńniaŭ i adzin prapuščany miač. Vizyt u subotu ŭ Kuncaŭščynu lidera čempijanatu žodzinskaha «Tarpeda» adkinuŭ «Darydu» na šostaje miesca.

Vydatki matčaŭ u vychodnyja

Najpierš dam paradu dla «niakonnych» (biezaŭtamabilnych) amataraŭ futbołu, jakija vybirajucca na matč z dalokich mikrarajonaŭ stalicy. Na matčy lepiej vyjaždžać za hadzinu, a to i paŭtary. Transpart chodzić hady ŭ rady, niekatoryja maršruty admienieny. Ja, naprykład, jechaŭ z Kurasoŭščyny tolki z adnoj pieriesadkaj, ale daroha zaniała chvilin piaćdziasiat piać. Choć padarožža cikavaje — heta nia z traktarnaha zavodu ciahnucca. Zialonyja pahorki, pad Sucharavam amal u niejkaje redkaleśsie trapili, potym znoŭ mikrarajon ź dzieviacipaviarchovikami-bliźniatami. Z histaryčnych admietnaściaŭ tolki šykoŭny carkoŭny budynak z brukavankaj i aharodžaj pierad hałoŭnym uvachodam dy kryžami na šybach. Prynaležnaść da relihijnaj deminacyi tak i zastałasia dla mianie zahadkaj.

Znajści stadyjon było niaciažka. Aryjentavaŭsia na fanackija dudki dy barabany, što vitali adkryćcio hulni. Heta byli niekalki dziasiatkaŭ zaŭziataraŭ «Tarpeda». Jany vitali svaich ulubioncaŭ vielizarnymi sinie-čyrvonymi ściahami, nu amal jak na stadyjonie «Noŭ kamp» u Barselonie, dy šmatlikimi vieršavankami.

Utulnaja arena

Čytajučy presu, ja padazravaŭ, što stadyjon u Kuncaŭščynie sympatyčny. Ale pabačanaje pieraŭzyšło čakańni. Tak, heta vielmi ŭtulnaja arena na try tysiačy hledačoŭ z novymi, jašče čystymi kresłami. Pa perymetry stadyjonu, adrazu za hladackimi trybunami, rastuć biarozy. Ujaŭlaju, što tut budzie praz dva tydni — kali «Daryda» zhulaje z «Homielem», a viasna zabujaie ŭsimi farbami. Uvosień ad charastva załatoj vosieni vakoł stadyjonu nia budzie jak vačej adarvać. Prynamsi, budzie čym zaniać siabie, navat kali hulnia budzie małacikavaj.

Adzinaja prablema darydaŭskaha stadyjonu — loža presy. Mała taho što raźmieščana na ŭschodniaj trybunie — u jasny dzień sonca bje prosta ŭ vočy, — da taho ž raźličana tolki na troch pradstaŭnikoŭ žurnalisckaj prafesii. Adno z kresłaŭ zajmaje sudździa-infarmatar z usimi pryčyndałami. Dobra, što stadyjon u subotu byŭ zapoŭnieny tolki napałovu: volnych miescaŭ chapała. A kali na arenie budzie anšlah? U hetym planie VIP-loža vyhladała kudy bolš pavažna — i miescaŭ bolej, i, zdajecca, ad daždžu lepiej abaronić. U subotu, napeŭna, bolšaść spartovych zaŭziataraŭ addali pieravahu chakiejnamu paŭfinału Kanada—Rasieja. Tamu znajści volnaje miesca na zachodniaj trybunie nie ŭjaŭlała ciažkaściaŭ.

«Daryda», ty — maja nadzieja

Jak i vodzicca ŭ nacyjanalnym pieršynstvie, pačatak hulni byŭ sumnym. Ci to kamandy pryhladalisia adna da druhoj, ci hrelisia na viasnovym soniejku. Pad viečar mocna paciapleła, ad ciepłyni nie vyratoŭvała navat zasień zachodniaj trybuny.

«Daryda» adrazu sieła ŭ hłybokuju abaronu, niahledziačy na zakliki svajho 30-hadovaha hałkipera Siarhieja Šałaja: «Nie siadajem nizka!» Šumnyja žodzinskija zaŭziatary adrazu adreahavali: «Chłopcy, siadajem nizka!» Šałaj svaryŭsia na svaich. U paraŭnańni bolš vyhadna hladzieŭsia kiper «Tarpeda» Ŭładzimier Sielkin, jaki jak moh padbadziorvaŭ svaich Sańkaŭ i Dzioniaŭ.

Maładym futbalistam «Darydy» było ciažka ciahacca z vopytnymi haściami. Pa antrapametryčnych danych ždanoŭskija chłopcy jaŭna sastupajuć fakturnym pradstaŭnikam «Tarpeda».

U pieršym tajmie vychavancy Ludasa Rumbucisa jašče davoli paśpiachova supraćstajali nabieham Žodzina, dzie vydzialalisia Siarhiej Ircha, Siarhiej Zianievič, Ihar Truchaŭ dy Vital Radzivonaŭ. Raz-poraz «Daryda» ahryzałasia kontratakami ci banalnym vynasam miača dalej ad varot. Piać razoŭ za hulniu miač vylataŭ za miežy trybun. U pierapynku ja specyjalna pajšoŭ pahladzieć, kudy ž dziavaŭsia skurany siabra futbalistaŭ. Akazałasia, što za zachodniaj trybunaj vialiki pustyr — piasok sa śladami niadaŭnich daždžoŭ. Vidać, niešta z časam tam pabudujuć.

Ale ŭtrymać ničyju da pierapynku nia zdoleli, prapuściŭšy na apošniaj chvilinie pieršaha tajmu vypad Vitala Radzivonava.

Kamandy razyšlisia pa raździavalniach — padapiečnyja Jurja Malejeva z pryŭźniatym nastrojem, «Daryda» paviesiŭšy nos. Hledačy skiravalisia ŭ kramu z staražytnaj biełaruskaj nazvaj «Kaaperatar». Tych, chto zastaŭsia na trybunach, zabaŭlali kamandnaja pieśnia na biełaruskaj movie («Daryda», ty — maja nadzieja, «Daryda» — serca maładzieje») dy dyktar-infarmatar, jaki aperatyŭna paviedamlaŭ pra vyniki astatnich hulniaŭ turu. A kali abviaściŭ, što na čempijanacie śvietu pa chakiei Rasieja sastupaje Kanadzie ź likam 0:4, stadyjon ščaśliva zahuŭ. Cikava, adkul biarucca sacyjalahičnyja vykładki, što biełarusy jak adzin vystupajuć za sajuz z «uschodniaj siastroj»?

Mienski kacioł

Presinh «Tarpeda» na varoty ŭ druhim tajmie praciahnuŭsia. Choć «Daryda» čas ad času pahražała varotam žodzincaŭ, prymusiŭšy Sielkina zrabić paru sejvaŭ. Praź piać chvilin paśla pačatku tajmu milicyja niekudy źviała za zachodniuju trybunu žodzinskich zaŭziataraŭ. Škoda chłopcaŭ. Nie, nichto ich na zhadanym pustyry nie rasstrelvaŭ. Vidać, tolki pravieryli dakumenty i praviali rastłumačalnuju hutarku. Ale jakraz u hety čas «Tarpeda» zabiła druhi hoł. U pravy nižni kut pakłaŭ miač Uładzimier Maroz.

Zaŭziatary «Darydy», a takich na stadyjonie była bolšaść, zasumavali. Ablahčyŭ sum tolki vychad na pole forvarda ždanoŭcaŭ Fiodara Łukašenki — najstarejšamu hulcu kamandy dastałasia niesłabaja porcyja apladysmentaŭ. Što b ni kazali, na mienskich uskrainach jašče z pavahaj staviacca da hetaha proźvišča.

Potym hałkiper «Tarpeda» zasumavaŭ i imknuŭsia znajści sabie zaniatak. Kolki razoŭ padychodziŭ da butelki z vadoj, vychodziŭ za miežy štrafnoj, padbadziorvajučy adnaklubnikaŭ: «Chłopcy, paciarpicie, zusim krychu času zastałosia». Navat sprabavaŭ pavisnuć na pierakładzinie. Ale zaŭziatar z trybuny byŭ suvory: «Nie łamaj inventaru!»

Chvilinie na 77-j «Tarpeda» pastaviła finalnuju kropku — 0:3. Z-za miežaŭ štrafnoj paceliŭ pa varotach samy vynikovy futbalist klubu — Ihar Truchaŭ. Niekalki dziasiatkaŭ balelščykaŭ padnialisia i z sumnym vidam padalisia da vychadu.

«Tarpeda» zachavała za saboj pieršaje miesca, adkinuŭšy «Darydu» na šostaje.

Źmieny ŭ «Dynama»

U nastupnuju piatnicu chłopcaŭ z «Darydy» čakaje niaprosty ekzamen — matč na hałoŭnaj arenie krainy z čempijonam krainy, mienskim «Dynama». Praŭda, staličny klub pačaŭ sezon nie najlepšym čynam i zajmaje ciapier vośmaje miesca. U paniadziełak «Dynama» strasianuli čarhovyja kadravyja pierastanoŭki. Prezydent klubu Jury Čyž adpraviŭ u adstaŭku hałoŭnaha trenera Jurja Šukanava, jaki pryvioŭ kamandu da załatych medaloŭ i kvalifikacyi Lihi čempijonaŭ. Na jahonaje miesca pryznačany Alaksandar Bašmakoŭ, što dahetul pracavaŭ z «Tarpeda-SKA». Bašmakoŭ užo piaty trener za apošnija dva z pałovaj hady ŭ «Dynama».

A ŭ niadzielu nas čakaje hałoŭnaja padzieja viasny. Na stadyjonie «Dynama» — finał Kubku Biełarusi (pačatak u 18.30). Trener moładzievaj zbornaj Jury Puntus, što ŭznačalvaje MTZ-RIPA, suprać svajho byłoha klubu — barysaŭskaha BATE. U minułuju subotu na «Traktary» prajšła «hieneralnaja repetycyja». Kamandy sustrakalisia ŭ ramkach čarhovaha turu čempijanatu. Barysaŭskija futbalisty pieramahli ź likam 1:0.

• 0
• 0
• 0
• 0
• 0
• 0
• 0
• 0