Šlub u klaštary
Adździeł ZAHS Aršanskaha harvykankamu spraviŭ ułaziny ŭ rekanstrujavanym budynku byłoha trynitarskaha klaštaru — pomniku architektury pieršaj pałovy XVIII st. Adnu pałovu budynku ŭžo zaniaŭ zanalny archiŭ. Pieršaja maładaja siamja Aŭłasienkaŭ była stvoranaja ŭ novym ZAHSie pry ŭdziele ŭsiaho haradzkoha načalstva. Naahuł ža ŭ hety dzień tut zarehistravali šlub 15 paraŭ. Darečy, zala ŭračystaściaŭ abstalavana jakraz u tym pakoi, dzie letaś byli vyjaŭleny na stoli j ścienach freski. Praŭda, ciapier jany zakanservavanyja, i ścieny ŭpryhožanyja kalažami z vyjavami staradaŭniaj i sučasnaj Voršy.
Pasiabravali z palakami
Padpisany dahavor ab siabroŭstvie j supracoŭnictvie pamiž Voršaj i polskim Minskam-Mazavieckim. Suviazi pamiž haradami pačali ŭstaloŭvacca ŭ 2002 h. Abodva harady raźmieščany na pierakryžavańni šlachoŭ, tamu ich histaryčnyja losy šmat u čym padobnyja, navat hierby amal adnolkavyja. I choć u polskaha pabracima Voršy nasielnictva ŭ 4 razy mienšaje, treba mierkavać, plon ad supracoŭnictva budzie — mo i nie ciapier, kali ŭ krainie razhortvajecca antypolskaja kampanija, a ŭ budučyni.
Jaŭhien Žarnasiek, Vorša
Kapajuć plac Voli
U centry Połacku, na placy Voli, pačalisia archiealahičnyja raskopki. Vykonvajuć ich studenty PDU pad kiraŭnictvam vykładčykaŭ universytetu Dzianisa Duka i Volhi Jemialjančyk. Paśla raskopaŭ na hetym miescy pabudujuć ofis «Biełarusbanku». U 1987—1988 h. na placy Voli raskopki ładziŭ Siarhiej Tarasaŭ. Padčas ich archieolah znajšoŭ reštki vialikaj siadziby połackaha juvelira XII st. Jon vyłučyŭ hipotezu, što taja siadziba mahła naležać Łazaru Bohšu, aŭtaru słavutaha kryža Eŭfrasińni Połackaj.
Vasil Krokva, Połacak
Užo barsuki šalejuć
Pad vioskaj Iža (Vialejščyna) dniami adbyŭsia niezvyčajny vypadak. Na siamju adpačyvalnikaŭ ź Vialejki napaŭ šalony barsuk. Jon prahryz tkaninu namiotu, ale pakusać ludziej nie paśpieŭ. Abaraniajučysia, adpačyvalniki zabili niaščasnuju žyviolinku. Ekspertyza pakazała, što barsuk byŭ šalony.
Na Vialejščynie za leta heta ŭžo druhi vypadak šalenstva ŭ žyvioł. Na pačatku lipienia ŭ viosku Tryhuzi pryjšła lisa i ukusiła za ruku haspadara, što adhaniaŭ jaje ad kurej.
Pavodle «Rehijanalnaj hazety»
