Ekspart čmialoŭ u Rasieju
Biełaruskich čmialoŭ z ahrakambinatu «Ždanovičy» buduć ekspartavać u Rasieju. Na siońnia «Ždanovičy» zabiaśpiečvajuć čmialami ŭsie ciapličnyja haspadarki Biełarusi. Hetych kuzurak vykarystoŭvajuć dla apyleńnia, što pavyšaje ŭradžajnaść.
Pavodle «Interfaksu»
Pakvapilisia na macu
U Aršanski HUUS źviarnuŭsia rabin Voršy (uradženiec i hramadzianin Izrailu) z zajavaj, što z haražu, jaki arenduje miascovaja habrejskaja hramada, nieviadomyja skrali 120 butelek vinahradnaha napoju, vosiem skryniaŭ z macoj, a taksama roznuju bytavuju techniku, posud dy inšaje. Złačyncaŭ pakul šukajuć. Aršanskaja habrejskaja hramada naličvaje zvyš 300 čałaviek, zbolšaha stałaha vieku. Dziasiatki ź ich darmova charčujucca za košt achviaravańniaŭ ź Izrailu.
Radyjaaktyŭnyja truby
Niekalki ton radyjaaktyŭnych trub vyvieziena z Voršy na mohilnik jadziernych adkidaŭ. Dziesiać hadoŭ tamu jany byli zatrymany na miažy jak kantrabanda dy apynulisia ŭ adnym z chlavoŭ miascovaha RUUS u centry horadu. Navat paśla taho, jak ich vyvieźli adsiul, radyjacyja ŭ chlavie siahała pad 800 mikrarenthien u hadzinu (pryrodny ŭzrovień radyjaaktyŭnaha fonu dla Voršy 8—17 mkr/h). Takoje doŭhaje niebiaśpiečnaje susiedztva nie prajšło darma. Pavodle śviedčańniaŭ milicyjantaŭ, im časta baleła hałava, maryŭ son. Dyj sabaki, što hadavalisia kinolahami ŭ tym ža chlavie, doŭha nie žyli. A litaralna praź ścianu znachodzicca dziciačy sad ź placoŭkaj dla hulniaŭ.
Kiraŭnictva RUUS vyrašyła zdać tyja truby na metałałom. Ale na vahach «Druhčarmetu» mielisia dazymetry… Dla taho, kab vyvieźci truby z Voršy, byŭ stvorany štab z supracoŭnikaŭ MNS, milicyi, pramatamnahladu. Ciapier na terytoryi, dzie znachodzilisia hetyja złaščasnyja truby, pravodzicca dezaktyvacyja.
Jaŭhien Žarnasiek, Vorša
Lahierny paradak
Prakuratura zaviała kryminalnuju spravu ŭ dačynieńni da 23-hadovaha milicyjanta, supracoŭnika Savieckaha RUUS Miensku. Jaho vinavaciać u tym, što padčas raboty ŭ dziciačym lahiery «Kupalinka» (Vałožynski rajon) jon pieradaŭ dźvie humovyja dubinki 17-hadovym junakam, jakija źbivali imi 10—11-hadovych dziaciej, a taksama raiŭ, jak heta lepiej rabić.
Pavodle «Rehijanalnaj haziety»
Kamientary