Albo pieramahajcie, albo sastupicie miesca novamu palityčnamu pakaleńniu. Lidery «dziasiatki» musiać pajści ŭ adstaŭku ŭ vypadku paražeńnia adzinaha kandydata. Takuju rezalucyju prapanuje na razhlad Kanhresu demakratyčnych siłaŭ Alaksandar Fiaduta.
Nastaŭ čas palityčnaj adkaznaści
Dahetul palityčnyja scenary ŭ Biełarusi pisalisia ananimnymi «hrupami tavaryšaŭ» i realizoŭvalisia va ŭmovach, kali kožny mieŭ prava skazać usim: «My b vyjhrali, dy vy nam pieraškodzili!». Nivodnaja hrupa «scenarystaŭ» nie ŭzhadniała svaich dziejańniaŭ ź dziejańniami inšych.
U 2006 h. takoj mahčymaści pierakłaści adkaznaść na plečy inšych nia budzie. Kanhres demakratyčnych siłaŭ budzie prachodzić zhodna sa scenarom, raspracavanym «dziasiatkaj», i heta varta tolki vitać. Bo ananimny scenar maje na ŭvazie kalektyŭnuju biezadkaznaść. Lidery asnoŭnych palityčnych siłaŭ demakratyčnaj supolnaści navučylisia pieraadolvać idealahičnyja supiarečnaści. Ale ŭmieńnie damaŭlacca — nie adzinaja jakaść, jakoj varta vałodać palitykam.
Ja nievypadkova kažu pra aŭtarski charaktar raspracavanaha scenaru. Imiony členaŭ kiroŭnaha orhanu «dziasiatki» viadomy ŭsim nam. Tamu ŭ kožnaha, chto ličyć siabie demakratam i budzie hatovy hałasavać za vyłučanaha zhodna z raspracavanym i zaćvierdžanym hetymi ludźmi scenarom zastajecca prava čakać, što hetyja viadomyja ŭsim ludzi zajaviać sumlenna: «My raspracavali mienavita taki scenar i prapanujem jaho demakratyčnaj supolnaści tamu, što vierym u pieramohu. My nia budziem abumoŭlivać jaho realizacyju spasyłkami na roznaha kštałtu pieraškody, bo ŭličyli ich. My hatovy iści da kanca i ŭ vypadku parazy hatovyja ŭziać na siabie palityčnuju adkaznaść za hetuju parazu, abviaściŭšy ab svajoj adstaŭcy z usich statusnych pasad u partyjach, ruchach i hramadzkich arhanizacyjach, jakija my ŭznačalvajem. My budziem hatovy addać svaje viedy, svoj vopyt, svaje palityčnyja suviazi novamu pakaleńniu biełaruskich demakrataŭ, jakoje pryjdzie nam na źmienu».
Tak rabili navat takija vialikija palityki, jak Helmut Kol i Lech Vałensa. Ź imi zastavałasia pavaha adnapartyjcaŭ. A na źmienu im pryjšli novyja ludzi, jakija nie paśpieli nalipnuć na zubach vybarnikaŭ.
Ja zaklikaju arhanizataraŭ Kanhresu demakratyčnych siłaŭ być sumlennymi i pryncypovymi da kanca. Uziaŭšy na siabie palityčnuju adkaznaść za raspracoŭku scenaru vybaraŭ-2006, jany pavinny abviaścić pra svaju hatoŭnaść pajści ŭ adstaŭku ŭ vypadku, kali hety scenar nie pryviadzie da pieramohi. Jany atrymajuć usie łaŭry ŭ vypadku pieramohi adzinaha apazycyjnaha kandydata — i strymajuć dadzienaje słova ŭ vypadku jaho paražeńnia. Bo tolki heta budzie aznačać, što jany vierać u realnaść prapanavanaha imi scenaru i hatovy achviaravać svajoj asabistaj palityčnaj karjeraj dziela jaho realizacyi. Lidery palityčnych partyj Biełarusi pavinny albo pieramahčy, albo sastupić miesca novamu pakaleńniu.
Vykazvajučy svaju ŭdziačnaść arhanizataram Kanhresu za zaprašeńnie ŭdzielničać u jaho rabocie, ja, na žal, nie zmahu skarystać hetuju mahčymaść. Tamu prašu razhladać moj list jak tekst vystupu pa paradku viadzieńnia Kanhresu i zaklikaju delehataŭ, što padzialajuć jaho asnoŭnyja pałažeńni, pastavić na hałasavańnie nastupnuju rezalucyju.
«1. Kanhres demakratyčnych siłaŭ zaklikaje ŭsie palityčnyja partyi, hramadzkija arhanizacyi i inicyjatyvy, pradstaŭniki jakich byli ŭpaŭnavažany prymać udzieł u praviadzieńni Kanhresu, akazvać usialakuju padtrymku štabu vyłučanaha Kanhresam adzinaha kandydata demakratyčnych siłaŭ, razhladajučy heta jak svoj hramadzianski abaviazak, niezaležna ad partyjnaści kandydata.
2. Kanhres demakratyčnych siłaŭ ličyć kiraŭnikoŭ arhanizacyj i partyj, jakija ŭvachodziać u skład pastajanna dziejnaj narady demakratyčnych siłaŭ («dziasiatka»), asabista adkaznymi za realizacyju rašeńniaŭ Kanhresu i zaklikaje ich pajści ŭ adstaŭku z usich hramadzkich pasad u vypadku pravału prapanavanaha i ažyćcioŭlenaha imi scenaru i paražeńnia vyłučanaha Kanhresam kandydata.»
Prašu pastavić na hałasavańnie rezalucyju całkam.
Z pavahaj, Alaksandar Fiaduta
Akaŭnt Kabančuka ŭzłamali — ale ci biełaruskija śpiecsłužby?10
Kamientary