Na vučobu ŭ Ameryku

Z 20 najlepšych VNU śvietu 17 — amerykanskija. 70% usich sučasnych laŭreataŭ Nobeleŭskaj premii pracujuć u VNU ZŠA. Jak atrymać amerykanskuju adukacyju?

Sprava nia tannaja

Sa sta najlepšych universytetaŭ śvietu bolšaść — amerykanskija. U śviecie taksama asabliva kacirujucca amerykanskija aśpiranckija prahramy. Mienavita ŭ ZŠA naradziłasia stupień MA (mahistar humanitarnych navuk).

Kab pastupić u amerykanski ŭniversytet, treba na dobrym uzroŭni vałodać anhielskaj movaj, jakuju vam daviadziecca zdavać jašče ŭ Biełarusi. Pa-druhoje, adukacyja tut nie biaspłatnaja, a košt jaje moža składać i 50 tys. dalaraŭ u hod (u zaležnaści ad specyjalnaści, universytetu i prahramy). Bolš padrabiazna pra ceny, prahramy i stypendyi možna daznacca na sajcie vco-edusa.net, jaki maje na mecie dapamać žycharam Biełarusi dy susiednich krainaŭ, jakija chočuć vučycca ŭ ZŠA.

Pa-treciaje, za kvateru daviadziecca płacić dalaraŭ 300—500, ale miesca ŭ internacie va ŭniversyteckim haradku budzie kaštavać jašče daražej. I kali niechta ź Biełarusi dumaje, što ja šykuju, zdymajučy na paru z chłopcam trochpakajovuju kvateru, jon pamylajecca. Aproč ekanomii, žyćcio na kvatery daje bolš svabody, bolš realnaj Ameryki, mienš tłumu.

Šukajcie stypendyju

Zarabić na navuku ŭ ZŠA na radzimie ciažka, tamu najbolš aptymalny varyjant — pošuk stypendyi. Na stupień bakalaŭra jaje atrymać ciažej, na navučańnie na vyšejšym uzroŭni (mahistar, doktar) — praściej. Ale ŭ hetym vypadku treba ŭžo mieć vyšejšuju adukacyju j prademanstravać dastatkovyja viedy ŭ svajoj halinie.

Ja vyjhraŭ amerykanskuju ŭradavuju stypendyju imia senatara Maski. Dziela hetaha treba było zdavać ekzameny TOEFL, GRE, prachodzić hutarku, pisać niekalki ese. Na pieršym etapie mnie taksama daviałosia sabrać vialikuju kolkaść dakumentaŭ i rekamendacyj.

Ja trapiŭ va ŭniversytet Paŭnočnaj Karaliny ŭ Čepeł-Hile. Škoła žurnalistyki tut ličycca adnoj z najlepšych u krainie. Tut ža znachodzicca i znakamitaja biznes-škoła, a taksama jurydyčnaja škoła, dzie čytaje lekcyi Džon Edvardz, što balatavaŭsia ŭ vice-prezydenty razam z Kiery.

Stypendyja senatara Maski — viadomaja j prestyžnaja prahrama ŭ krainach byłoha Sajuzu. Siarod jaje znakamitych atrymalnikaŭ — prezydent Hruzii Michaił Saakašvili. Prahrama mahistarskaj adukacyi pakryvaje ŭsie asnoŭnyja vydatki, ułučna z apłataj navučańnia i medstrachoŭkaj. Administruje jaje IREX, niekalki hod tamu vykinuty ź Biełarusi ŭładami. Tym nia mienš, prahrama praciahvaje isnavać, a novy konkurs tradycyjna abvieściać uvosień. Umovy možna pahladzieć na sajcie ambasady ZŠA ŭ Biełarusi. Jość i inšyja prahramy stypendyj, ale kali vas cikavić niejki kankretny ŭniversytet, maje sens šukać stypendyi na aficyjnym sajcie navučalnaj ustanovy.

Jość jašče adzin varyjant. Paśla pastupleńnia ŭ aśpiranturu možna atrymać pracu pamočnika vykładčyka ci pamočnika ŭ daśledavańniach. Vam daviadziecca praviarać testy, piśmovyja zadańni studentaŭ, kapijavać litaraturu dla prafesara ci zajmacca daśledčaj dziejnaściu ŭ labaratoryi. Takim čynam, pracujučy na ŭniversytet, u bolšaści vypadkaŭ vy vyzvalajeciesia ad płaty za vučobu, a taksama majecie niebłahuju kapiejku na žyćcio. Taki varyjant aktualny dla tych, chto choča atrymać PhD — stupień doktara filazofii.

Vałodać movaj

Kab pastupić u amerykanski ŭniversytet, vam najpierš nieabchodna davieści, što vy vałodajecie anhielskaj movaj. TOEFL — test, prydumany mienavita dla taho.

Isnujuć try varyjanty ispytu — piśmovy, kamputarovy i anłajnavy. Ź niadaŭniaha času možna zdavać ispyt u Internecie, ale sprabavać heta varta, tolki kali majecie niebłahuju i stabilnuju chutkaść złučeńnia. I pamiatajcie: test nie biaspłatny. Paznajomic- ca z patrabavańniami, a taksama papraktykavacca možna na aficyjnym sajcie — toefl.org. Košt ispytu — 140 dalaraŭ.

Dla atrymańnia stupieni bakalaŭra ŭ Kanadzie ci ZŠA vam daviadziecca taksama zdavać SAT — Scholastic Aptitude Test — test na zdolnaść da navučańnia, jaki aceńvaje ahulnyja viedy pa litaratury, matematycy i historyi.

SAT byvaje dvuch vidaŭ — pravierka ahulnych zdolnaściaŭ myśleńnia (SAT I, reasoning test) i pravierka viedaŭ pa kankretnym pradmiecie (SAT II, subject test). Na test SAT I dajecca try hadziny, na SAT II — adna.

Vyniki vam paviedamiać niedzie praź dzion dziesiać paśla zdačy. ETS, Słužba adukacyjnych testaŭ — niaŭradavaja arhanizacyja, jakaja administruje ŭsie testy, što apisvajucca ŭ hetym artykule, — moža sama dasłać vašy vyniki va ŭniversytety, kudy žadajecie pastupić. Pravodzicca test u traŭni—červieni. Rehistravacca treba da sakavika. Ispyt kaštuje 38 dalaraŭ.

GRE i GMAT

Kali vy źbirajeciesia pastupać u aśpiranturu, zamiest SAT vam daviadziecca zdavać aśpirancki ispyt GRE (dla humanitaryjaŭ) ci GMAT (dla MBA), dzie praviarajecca lahičnaje myśleńnie, razumieńnie movy, a taksama matematyčnyja zdolnaści. Nia tolki biełarusam, ale i amerykancam ciažka dajecca moŭnaja častka testu, bo praviaraje jana razumieńnie akademičnaje leksyki, jakaja ŭ hutarkovym maŭleńni sustrakajecca vielmi redka.

Zdajučy GRE, taksama daviadziecca pisać dva ese. Raju — sačycie za strukturaj, chaj vaš tvor budzie nia nadta doŭhi, ale kab usio było lahična. Kaštuje test 120 dalaraŭ, GMAT — 195 dalaraŭ.

Ale nie ličycie, što ŭsio heta niemahčyma. Hałoŭnaje — pastavić pierad saboj metu. Dla pačatku raju padyści ŭ «Amerykanski centar», što znachodzicca na staličnym praspekcie Skaryny (Niezaležnaści), 169 — «Biznes-centar «XXI st.» paŭdniovaje kryło, ofis 512. Tam jość niebłahaja biblijateka na temu adukacyi ŭ Amerycy, dzie jość i dapamožnaja litaratura pa zdačy vyšejpieraličanych ispytaŭ.

Ci varta sprabavać?

Kali vy žadajecie atrymać niezabyŭny dośvied žyćcia za miažoj, pavysić viedy, zavieści novych siabroŭ, a taksama akunucca ŭ čaroŭny śviet amerykanskaje ŭniversyteckaje adukacyi — adnaznačna treba sprabavać pastupać. Uzvažcie ŭsie plusy i minusy, acanicie realna svaje zdolnaści i, hałoŭnaje, rychtujciesia. Pastupleńnie ŭ amerykanskuju VNU moža zaniać hod, dva, navat try. Ale amerykanski dyplom daje vydatnyja šancy na pracaŭładkavańnie jak u Biełarusi, tak i praktyčna ŭ luboj krainie. Studentam być cikava. Tym bolš studentam u Amerycy.

• 0
• 0
• 0
• 0
• 0
• 0
• 0
• 0