Respublikanskaja prakuratura vystaviła abvinavačvańnie lideram niezarehistravanaj arhanizacyi «Partnerstva», jakaja mierkavała zajmacca niezaležnym nazirańniem u časie vybarčaj kampanii.
U dačynieńni da zatrymanych raspačataja kryminalnaja sprava pavodle art.193 č.2 KK «Arhanizacyja albo kiravańnie abjadnańniem, jakoje zamachvajecca na asobu i pravy hramadzianaŭ». Mikołu Astrejku, Cimochu Drančuku, Alaksandru Šałajku, Eniry Branickaj pahražaje albo aryšt na termin da šaści miesiacaŭ, albo źniavoleńnie terminam da troch hadoŭ.
Finansavańnie «Partnerstva», cytuje «Interfaks» słovy staršyni KDB Ściapana Sucharenki, ździajśniałasia praz rehijanalnaje adździaleńnie Nacyjanalnaha demakratyčnaha instytutu pry ŭdziele hramadzianina ZŠA Devida Hamiltana.
Nahadajem, što lidery «Partnerstva» byli zatrymanyja miesiac tamu, a na ich kvaterach učynienyja pieratrusy. Tady ž BT pakazała siužet pra nibyta znojdzienyja padčas pieratrusu ŭ ofisie «Partnerstva» źviestki ekzyt-połaŭ, pavodle jakich na prezydenckich vybarach pieramoh Alaksandar Milinkievič.
Juryst Valancin Stefanovič miarkuje, što KDB zmahajecca z ułasnaprydumanymi chimerami: «Heta całkam u duchu 1930-ch – prydumlajuć sabie varožyja arhanizacyi i potym «z pośpiecham» ich pieramahajuć. Arhanizacyja «Partnerstva» miełasia zajmacca nazirańniem, i heta napałochała ŭłady. Ale ŭsio, što specsłužby prypisvali aryštavanym i čym pałochali hramadzianaŭ – teraryzm, dziaržaŭny pieravarot, – aničoha nia spraŭdziłasia. Heta pšyk. Ale im treba davieści raspačatuju «spravu» da kanca, adsiul i kryminalnaja sprava». Sp.Stefanovič kaža, što papraŭki ŭ Kryminalny kodeks pastavili jaho ŭ supiarečnaść z Kanstytucyjaj: «Kryminalny kodeks nie adpaviadaje mižnarodnym normam, bo faktyčna abmiažoŭvaje prava na svabodu asacyjacyjaŭ. Usie niezarehistravanyja i niedziaržaŭnyja arhanizacyi pavodle novaha Kodeksu apynulisia pa-za zakonam, a heta supiarečyć Asnoŭnamu zakonu, jaki harantuje svabodu asacyjacyjaŭ».
Što da perspektyvaŭ aryštavanych aktyvistaŭ «Partnerstva», to tut Valancin Stefanovič nia peŭny ŭ kančatkovym vyraku: «Pačakiem zaviaršeńnia spravy».
