Šuškievič u Mahilovie: «Davajcie abjadnajemsia i budziem havaryć pa-biełarusku»
9 śniežnia ŭ Mahilovie adznačyli hadavinu padpisańnia Biełaviežskich pahadnieńniaŭ ab stvareńni SND i spynieńni isnavańnia SSSR. Abłasnaja arhanizacyja Abjadnanaj hramadzianskaj partyi zaprasiła z hetaj nahody pieršaha kiraŭnika biełaruskaj dziaržavy Stanisłava Šuškieviča.
Sustrecca z staršyniom Viarchoŭnaha Savietu 12 sklikańnia ŭ hramadzki centar «Koła» pryjšli kala sotni čałaviek. Na sustrečy, siarod inšaha, Šuškievič pakazaŭ svaju knihu ŭspaminaŭ «Majo žyćcio, krach i ŭvaskrašeńnie SSSR», jakaja dniami źjaviłasia na pryłaŭkach kniharniaŭ Maskvy i Sankt-Pieciarburhu. Biełaruskaja versija hetaj knihi na pačatku nastupnaha hodu prahučyć u efiry Svabody.
Na sustrečy Stanisłaŭ Šuškievič adrazu zajaviŭ hramadzie, što ŭ Viskulach ni jon, ni prezydent Rasiei Barys Jelcyn z prezydentam Ukrainy Leanidam Kraŭčukom nia źbiralisia, kab razvalić SSSR. Nieabchodnaść padpisańnia pahadnieńnia ŭźnikła paśla abmierkavańnia sytuacyi, jakaja skłałasia ŭ Savieckim Sajuzie, jaki pavodle Stanisłava Šuškieviča, skanaŭ jašče ŭ žniŭni 1991 hodu. Na momant padpisańnia pahadnieńniaŭ, zajaviŭ jon, usie respubliki Sajuzu mieli deklaracyi ab niezaležnaści. Vializnaja kraina, praciahnuŭ spadar Šuškievič, nie była ŭžo kiravanaj.
Tema Biełavieskich pahadnieńniaŭ na sustrečy choć i była asnoŭnaj, ale ŭsio ž najbolš uvahi Šuškievič addaŭ adkazam na pytańni pra mahčymaści abjadnańnia biełaruskaj apazycyi ciapier. Niekatoryja ź jahonych vykazvańniaŭ:
«Adkažycie na pytańnie dziela čaho abjadnoŭvacca? Abjadnoŭvacca treba, šanoŭnaje spadarstva, dziela kankretnaj mety. Voś, kali my abjadnajemsia i pojdziem adnym frontam, to jašče nieviadoma, ci mo lepiej było b iści niekalkimi asobnymi partyjami. Heta jak na vajnie. Stratehija — heta kali treba pieramahčy.A taktyka — heta treba vyjhrać siońniašniuju bojku. Ci treba nam abjadnoŭvacca, kab pierci naprałom, kab usich źniščyli. Ci možna prasunucca napierad roznymi šlachami. Voś heta pytańnie i surjoznaje».
«Nam treba zrazumieć, što ŭ nas ciapier niama nivodnaj narmalnaj palityčnaj partyi. Čamu? Partyi — zaŭždy majuć pradstaŭnictva ŭ parlamencie. Ich u nas nia moža być tam, bo niama vybaraŭ z 1996 hodu. Jak moža isnavać partyja, kali ŭ jaje niama finansavańnia. Palityčnyja partyi ŭ dziaržavie, zaŭždy finansujucca dziaržavaj praparcyjanalna hałasam vybarcaŭ. Uva ŭsich demakratyčnych dziaržavach tak. U nas ža nienarmalnaja dziaržava. Dehieneratyŭnaja».
«Ciapier my ŭsie abjadnanyja. My chočam usie, kab zrabić naš ład lepšym. My chočam źmieny palityčnaj systemy. My chočam abrać u parlament tych, kamu my daviarajem. A heta ciažka ŭ nas zrabić. Ciapier my abirajem taho chto lepiej chłusić. Dziakuj za papraŭku «Pryznačajuć».
«Davajcie abjadnajemsia i budziem havaryć pa-biełarusku. Voś tady sapraŭdy ziemlatrus adbudziecca. Voś Mahiloŭ uziaŭ i pajšoŭ havaryć pa-biełarusku. Voś heta budzie pieršy krok da abjadnańnia tych chto choča sapraŭdnaj niezaležnaj Biełarusi. Nie takoj Biełarusi jak lozunh visić — „Ja Biełaruś“. U nas adzin taki ŭ Biełarusi: „Dziaržava — heta ja“. Prostych pytańniaŭ nie byvaje, a prymityŭnym rozumam adnaho čałavieka składanyja pytańni vyrašać składana».
Adno z pytańniaŭ tyčyłasia taho chto ž Biełaruśsiu kiruje nasamreč:
Šuškievič: «Ja nia viedaju adkazu na hetaje pytańnie. I vy nia viedajecie. Kali my ciapier raźbirajemsia chto kiravaŭ Savieckim Sajuzam — to i tut składanaje pytańnie. Jość asoby ŭpłyvu — jany vyznačajuć duža mnohaje. Chto hetyja šeryja kardynały — adkazać peŭna ciažka. Demakratyčnaja systema dazvalaje hetych ludziej stavić na svaje miescy».
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary