«Upieršyniu čuju Dzianisa pa-rusku». Papularny biełaruskamoŭny aŭtabłohier daŭ intervju na ruskaj movie. Kamientatary zadali šmat pytańniaŭ
Moŭnaje pytańnie ŭ kamientarach abmiarkoŭvajuć hetak ža aktyŭna, jak samu temu videa.
Biełarus Dzianis Majtak — papularny biełaruski aŭtabłohier. Chłopiec dobra ciamić u techničnaj častcy, tamu aproč standartnaha ramontu ruchavikoŭ zajmajecca ich dapracoŭkaj, robić ich bolš mahutnymi.
Ahułam mužčyna maje ŭžo bolš za 10 hadoŭ dośviedu pracy z aŭtamabilnymi ruchavikami, a apošnija niekalki hadoŭ aktyŭna viadzie błoh u instahram. Ciapier u Dzianisa bolš za 16 tysiač padpisčykaŭ. Pry hetym usie svaje videa jon robić na sakavitaj biełaruskaj movie.
Niadaŭna ź im vyjšła intervju na av.by — videa było pryśviečana pasłuzie, jakuju błohier pačaŭ akazvać ź minułaha hoda. Dzianis, aproč ramontu i ŭdaskanalvańnia aŭto, staŭ zajmacca padboram spažyvanych ruchavikoŭ.
Pakolki aŭdytoryja błohiera pryzvyčaiłasia da taho, što ŭvieś jahony kantent vyklučna na biełaruskaj, pad videa pa-rusku źjaviłasia šmat kamientaroŭ, jakija tyčacca nie źmiestu vypusku, a movy.
Mnohija adznačajuć, što nikoli nie čuli, kab mužčyna razmaŭlaŭ pa-rusku, tamu dla ich heta niazvykła.
«Vielmi niazvykła bačyć Dzianisa, jaki razmaŭlaje na ruskaj», — adznačaje adzin z hledačoŭ.
«Škada, što tut Dzianis havoryć pa-rusku. Miarkuju, što bolšaść jahonych padpisčykaŭ, ubačyŭšy vypusk ź im, spadziavalisia, što jon i tut budzie razmaŭlać na toj ža movie, na jakoj viadzie svoj błoh», — hučyć adzin z samych upadabanych kamientaroŭ pad videa.
Pad videa taksama šmat kamientaroŭ typu: «Dzie biełaruskaja mova, Dzianis?», «Mova lepiej», «Čamu nie pa-biełarusku?».
«Ździŭleny jaho słuchać na ruskaj movie, pryvyk jaho błoh na biełaruskaj movie słuchać», «Mnie adnamu rezała vušy havorka Dzianisa na ruskaj?» — hučać inšyja kamientary, napisanyja ŭ aryhinale na ruskaj.
«Vielmi škada, što hety vypusk nie zrabili na biełaruskaj movie. Łajk Dzianisu za vusy!» — adznačaje hladač.
Jašče adzin napisaŭ: «Łajk za kancoŭku ad Dzianisa», — dziakujučy za toje, što raźvitaŭsia z aŭdytoryjaj błohier pa-biełarusku, pramoviŭšy: «Budźcie dobryja adzin da adnaho i da novych sustreč».
Pad publikacyjaj u instahramie błohiera naohuł amal usie kamientary tyčacca mienavita movy, a nie źmiestu.
«Niejak niezvyčajna hučyć Dzianis, kali razmaŭlaje nie pa-biełarusku», «Upieršyniu čuju Dzianisa na ruskaj».
Aproč aŭtamabilnaj tematyki, chłopca cikaviać vandroŭki pa Biełarusi, u jakija jon jeździć na niemaładym mikraaŭtobusie Mitsubishi, u jaki pastaviŭ dyzielny 3‑litrovy ruchavik z aŭtamatyčnaj karobkaj ad BMW.
Doŭhija videa z vandrovak jon vykładvaje ŭ svam jutub-kanale.
Ciapier čytajuć
Minsk, Varšava, Vilnia — paraŭnoŭvajem, dzie praściej kupić kvateru čałavieku ź siaredniaj zarpłataj5
Kamientary