Siarod imprezaŭ, što prajšli ŭ Infarmacyjnym centry CVK u dzień vybaraŭ, była pres-kanferencyja pieršaha namieśnika ministra infarmacyi Lilii Ananič. Jana vykazała niekalki vyraznych antynomijaŭ.
Pa-pieršaje, paviedamiła, što «pa nieviadomych Ministerstvu infarmacyi pryčynach adzin z kandydataŭ u prezydenty nie skarystaŭsia svaim pravam druku pieradvybarčaj prahramy ŭ centralnych ŚMI». Adnak potym zaznačyła, što pryčyny ŭsio ž viadomyja: «Da 26 lutaha prahrama nie była padadzienaja ŭ centralnyja hazety adpaviednym čynam. Tamu jana j nie była nadrukavanaja».
Potym spn.Ananič vykazała zadavalnieńnie, što padčas vybarčaj kampanii ministerstva nia vykazała nivodnaha papiaredžańnia hazetam, aprača «Zhody» ź jaje karykaturami. «Značycca, hazety pastavilisia da aśviatleńnia vybarčaj kampanii adkazna», – zadavolena zaśviedčyła Ananič. I amal tut ža čamuści paviała pra supraćlehłaje: «Paśla vybaraŭ my praviadziom surjozny analiz publikacyjaŭ u niekatorych hazetach padčas vybarčaj kampanii, damo im acenku j raźbiaromsia ź ich pravamocnaściu». I praciahnuła: «Niekatoryja hazety dazvalali sabie adkrytuju ahitacyju za taho ci inšaha kandydata. Ale niekatoryja i ŭvohule pastavilisia da hetaha biezadkazna (par. jaje ž charaktarystyku pracy ŭsich ŚMI jak adkaznaj, dadzienaj za try chviliny dahetul. – Z.D.), i raspaŭsiudžvali zakliki da maładych ludziej pryjści na płošču. Voś, naprykład, jak rascanić materyjał «Parady mitynhoŭcam» u adnoj z hazetaŭ, nie chaču rabić hetaj hazecie reklamu (materyjał Alesia Kudryckaha ŭ «NN» № 9. – Z.D.): tut ža adkrytym tekstam utrymlivajucca pryzyvy pryjści na płošču j mitynhavać. Što heta za parady?
Mnie daviałosia pierapytać spn.Ananič, jak jana pierakładaje ź biełaruskaj słova «parady», a kali pačuŭ tolki: «Ja razumieju biełaruskuju movu», paviedamiŭ «pravilny adkaz».
