Z Volhaj Hajdukovaj my sustrakajemsia padčas jaje čarhovaha pryjezdu ŭ Minsk. Jana znoŭ nie zmahła pabačyć syna — pryniali tolki praduktovuju pieradaču. Nie bačyŭ Andreja Hajdukova i advakat. Suviaź z rodnymi Hajdukoŭ padtrymlivaje tolki dziakujučy listavańniu.
Volha Piatroŭna, što vy, jak maci, nieanhažavany ŭ palityku čałaviek, dumajecie pra historyju sa źniavoleńniem vašaha syna?
Volha Hajdukova: Ja dumaju, što heta stapracentovaja falsifikacyja. Heta pakazalny vystup dla tych, chto idzie ŭ palityku, chto naležyć da apazicyi. Asabliva heta tyčycca moładzi.
A historyja z Andrejem… Pravilna niechta skazaŭ — siońnia jon ślesar, a zaŭtra — palityk.Syna sto razoŭ papiaredžvali, prasili admovicca ad hetaj arhanizacyi. Ale tam było šmat čaho zroblena. Statut byŭ napisany, usio było padrychtavana dla rehistracyi. Ja sama bačyła. Andrej byŭ aktyŭnym. Pracavaŭ na kandydata ad apazicyi padčas apošnich vybaraŭ. Naturalna, što ŭsio heta nie ŭsim padabałasia.
Čamu tady mienavita vaš syn ciapier za kratami, a nie kiraŭnik arhanizacyi Jaŭhien Kanstancinaŭ, albo niejki inšy, bolš viadomy apazicyjanier ź Viciebska? Andrej Hajdukoŭ — nie viadomaje imia.
Volha Hajdukova: Dumaju, inšyja spynialisia pad ciskam, a syn usio adno išoŭ napierad. Jon navat u listach svaich piša, što najlepšym padarunkam dla jaho budzie, kali arhanizacyju (Sajuz maładych intelektuałaŭ) zarehistrujuć. Kali sprava da kanca budzie daviedzienaja. Dumaju, inšyja na peŭnym etapie spynilisia, a syn pajšoŭ dalej i papłaciŭsia za heta.
Ci nie padajecca vam, što sprava Andreja Hajdukova nie maje vialikaha rozhałasu. Takoha, naprykład, jak sprava Antona Surapina, jaki taksama pravioŭ niekalki miesiacaŭ u «amierykancy»?
Volha Hajdukova: Ja b nie skazała tak. Šmat čytała pra spravu Andreja. U «Narodnaj voli». U «Biełhaziecie»… Asabliva kali ŭsio pačynałasia.
Viedajecie, ja nie anhažavany ŭ palityku čałaviek. Ale vydatna razumieła, čym usio moža skončycca. Ale Andrej zaŭsiody havaryŭ, što nie robić ničoha supraćzakonnaha. Ja vieru svajmu synu.Mahčyma, jon pa svajoj maładości nie asabliva razumieŭ niebiaśpieku. Za što i papłaciŭsia.
Jak vaša siamja stavicca da dziejnaści Andreja?
Volha Hajdukova: My jak mahli abierahali Andreja ad palityki. U nas byli vialikija roznahałośsi.
Ale kali zaraz va ŭsio heta my akunulisia, to zrazumieli, što Andrej maje racyju. My sutyknulisia z usim hetym łob u łob.Z tym, što listy nie dachodziać ni jamu, ni nam. Z tym, što advakata nie dapuskajuć… Napeŭna, nie ŭsio ŭ nas u krainie tak, jak chočacca.
Što pieradajacie Andreju? Jon niešta prosić kankretnaje, albo nie?
Volha Hajdukova: Pradukty. Patrabavaŭ śviežuju harodninu i sadavinu. Hrušy pieradali, jabłyki. Piercy. Skazaŭ, sałat budzie rabić. Jon u nas taki tavaryš.
A akramia palityki Andrej čym zajmajecca? Mahčyma, niejkija zachapleńni ŭ vašaha syna asablivyja jość.
Volha Hajdukova:Dy šmat čym, nasamreč. Jon ža ŭ nas šmatbakovaja asoba.
Rybałku lubić, histaryčnuju litaraturu. Zamaŭlaje navat admysłova praź internet. Dy ŭsio jamu cikava. Chiba što asablivuju cikavaść da kampjutara prajaŭlaje.Na pačatku baćka jamu niešta tam tłumačyŭ, ale ciapier Andrej sam z usim raźbirajecca. Žyvioł dahladaje taksama. Dapamahaŭ miascovamu tavarystvu abarony žyvioł.
Syn źmianiŭsia za hetyja dva miesiacy? Što novaha ŭ im vy zaŭvažyli, kali mierkavać pa listach?
Volha Hajdukova: Było niekalki tryvožnych listoŭ. Asabliva ŭ apošni čas, kali my pačali ich čaściej atrymoŭvać. Raniej ža ŭvohule ničoha nie było. Pieršyja tydni listy nie dachodzili ad Andreja.
Ale, u cełym, jon trymajecca. Navat razdaje nam daručeńni roznyja.Kotku pakarmić niečym, albo jašče što. Siastry svajoj niejkija daručeńni daje. Ale heta asabistaje ŭžo.
Vam davodziłasia bačyć śledčaha (Aleh Barysievič)? Jakoje ŭražańnie ab im majecie?
Volha Hajdukova: Ja bačyła jaho adzin raz. Ničoha drennaha skazać nie mahu, kali ščyra…
Adzinaje, mnie niezrazumieła, čamu Andreja pieraviali znoŭ u Minsk, bo śledčy zastajecca ŭ Viciebsku. I paśla hetaha pieravodu nijakich śledčych dziejańniaŭ praviedziena nie było.Navošta było pieravodzić syna ŭ Minsk? Usio ž možna było i tam, u Viciebsku pakinuć. Navošta jon u Minsku?.. U nas vielmi šmat pytańniaŭ i mała adkazaŭ. Nichto z našaj siamji i siabroŭ Andreja nie vieryć viersii KDB. Mahčyma, adbyłasia niejkaja padstava. Ja nie viedaju.
Na vašu dumku, čamu šmat chto nie sumniavajecca ŭ aficyjnaj viersii? Infarmacyi pa spravie Andreja amal niama.
Volha Hajdukova: Aficyjnaja viersija śmiešna hučyć. Andrej z zamiežnych movaŭ viedaje tolki niamieckuju na školnym uzroŭni. I ŭsio. Ruskuju, biełaruskuju jašče. Syn za miažu tolki adzin raz jeździŭ, kali nie pamylajusia. Niejki forum u Brusieli byŭ ŭ minułym albo ŭ pazaminułym hodzie. Tady šmat chto pajechaŭ ź im razam. Jon ža nie adzin byŭ u pajezdcy.
Jak budzie raźvivacca sprava Andreja dalej? Čaho vy čakajecie ad hetaj historyi?
Volha Hajdukova: A vy jak dumajecie? Ja nie viedaju.
Samaje strašnaje, što niechta napisaŭ dla Andreja scenar, a jon nie choča pa im hulać.Ja b vielmi chacieła daviedacca, chto hety scenaryst. Chacieła b pahladzieć jamu ŭ vočy. My nie viedajem, što ŭ ich u hałavie, što jany zapłanavali. Ja dumaju, što i Andrej hetaha nie viedaje.
