Nacbank — za ŭviadzieńnie kryminalnaj adkaznaści za stvareńnie finansavych piramidaŭ

Nacyjanalny bank Biełarusi padtrymlivaje ideju ŭviadzieńnia kryminalnaj adkaznaści za stvareńnie finansavych piramidaŭ, zajaviŭ namieśnik staršyni praŭleńnia banka Siarhiej Dubkoŭ na pres-kanfierencyi ŭ Minsku 6 lutaha.

Pry hetym jon zaznačyŭ, što luboje raźvićcio finansavaha rynku moža mieć vynikam źjaŭleńnie struktur, jakija pavodziać siabie niesumlenna, «heta chvaroba rostu».

«Piramida — heta nasmark, jaho treba lačyć usimi mahčymymi sposabami.

«Nieabchodnaje ŭniasieńnie źmienaŭ u zakanadaŭstva, u pieršuju čarhu ŭ Kryminalny kodeks, ź jasnaj identyfikacyjaj paniaćcia „piramida“ i źmienaŭ pa adpaviednych artykułach pakarańniaŭ.

Jon źviarnuŭ uvahu na toje, što, naprykład, u Kazachstanie ŭ hetym pytańni «ŭžo vyjšli na finišnuju pramuju pryniaćcia zakona, jaki jasna rehłamientuje, što takoje finansavaja piramida i jakoje pakarańnie jana ciahnie». «Pryčym u mnohich krainach, u tym liku jeŭrapiejskich, heta dakładna zamacavanyja normy», — dadaŭ Dubkoŭ.

Na zakančeńnie jon nahadaŭ, što pa pytańni, źviazanym ź dziejnaściu «MMM» u Biełarusi, sprava pieradadziena ŭ sud. Namieśnik kiraŭnika Nacbanka vykazaŭ nadzieju, što abvinavačanyja «buduć pakaranyja adpaviednym čynam».

***

Nahadajem, supracoŭniki minskaha ofisa «MMM-2011» byli zatrymanyja śpiecsłužbami 16 sakavika 2012 hoda. U dačynieńni da ich KDB raspačaŭ spravu na padstavie č. 3 art. 233 KK. Rasśledavańnie było pieradadziena ŭ Śledčy kamitet.

Na sustrečy z žurnalistami 27 krasavika staršynia SK Valeryj Vakulčyk paviedamiŭ, što ŭron ad dziejnaści «MMM-2011» u Biełarusi aceńvajecca ŭ 800 młn. rubloŭ.

Pavodle infarmacyi KDB, kaardynatar finansavaj piramidy i inšyja asoby, dziejničajučy ad imia nie zarehistravanaj u padatkovych orhanach i orhanach miascovaj vykanaŭčaj ułady arhanizacyi «MMM-2011», ažyćciaŭlali na terytoryi Biełarusi dziejnaść pa pryjomie ŭkładaŭ i stavak na vyjhryš ad nasielnictva. Vypłata pracentaŭ pa ŭkładach abo viartańnie ŭkładzienych hrašovych srodkaŭ z ulikam ahavoranaha ŭznaharodžańnia (vyjhryšu) ažyćciaŭlałasia členami hrupy za košt pryciahnieńnia novych układaŭ (stavak) hramadzian, jakija naŭmysna ŭvodziacca ŭ zman adnosna zakonnaści i ekanamičnaj metazhodnaści ŭčynieńnia takich apieracyj.

U vyniku niezakonnaj dziejnaści «MMM-2011» u finansavyja machinacyi akazalisia ŭciahnutymi niekalki tysiač hramadzian Biełarusi. Asnoŭny kantynhient udzielnikaŭ finansavaj piramidy skłali maładyja ludzi 1985–1990 hadoŭ naradžeńnia, nieznajomyja ź dziejnaściu «MMM» pačatku 1990-ch hadoŭ i jaje niehatyŭnymi nastupstvami dla miljonaŭ hramadzian.

• 0
• 0
• 0
• 0
• 0
• 0
• 0
• 0