U aficyjnaj bijahrafii Šejman — prafiesar. Jak akazałasia, psieŭdaakademii

Dziŭny fakt vyjaviŭ błohier d-zholik.livejournal.com.

U dzień pryznačeńnia Viktara Šejmana na pasadu kiraŭnika spravaŭ prezidenta na sajcie łukašenkaŭskaha infarmahienctva BiełTA źjaviłasia aficyjnaja bijahrafija pryznačenca, u jakoj hienierał-pałkoŭnika nazyvajuć jašče i «prafiesaram».

Błohier vyjaviŭ, što

tak zvanaja Akademija prablem biaśpieki, abarony i pravaparadku Rasijskaj Fiederacyi (abrevijatura — ABOP) — ahulnarasijskaja hramadskaja arhanizacyja, zasnavanaja ŭ Rasii 10 lipienia 2000. Akazvajecca, jaje likvidavali jašče 10 śniežnia 2008 hoda rašeńniem Viarchoŭnaha Suda RF pa zajavie Hienieralnaha prakurora RF.

Z aficyjnaha paviedamleńnia Hienieralnaj prakuratury Rasiei: «Pravierkaj, praviedzienaj Hienieralnaj prakuraturaj RF sumiesna z FSB Rasii, FNS Rasii, Miniustam Rasii, Rasaduknahladam, Hieraldyčnaj radaj pry Prezidencie Rasijskaj Fiederacyi, byli vyjaŭleny šmatlikija parušeńni zakanadaŭstva ŭ dziejnaści nazvanaj hramadskaj arhanizacyi. Akademija, źjaŭlajučysia hramadskaj arhanizacyjaj, niezakonna pazicyjanavała siabie jak dziaržaŭnaja struktura, nadzielenaja adpaviednymi paŭnamoctvami. Pry ažyćciaŭleńni svajoj dziejnaści niezakonna vykarystoŭvała znaki i atrybuty dziaržaŭnaj ułady, u tym liku štandar Prezidenta Rasijskaj Fiederacyi.

Akademija paŭsiudna vykarystoŭvała najmieńnie Akademija prablem biaśpieki, abarony i pravaparadku i ABOP, vyklučajučy ŭkazańnie na arhanizacyjna-pravavuju formu, što stvarała bačnaść dziaržaŭnaha statusu Akademii.

Pavodle zaklučeńnia Hieraldyčnaj Rady pry Prezidencie Rasijskaj Fiederacyi, Akademijaj nasupierak zakanadaŭstvu ŭ halinie ŭznaharodnaj i hieraldyčnaj palityki byli zasnavany ordeny, miedali, nahrudnyja znaki, jakija majuć padabienstva ź dziaržaŭnymi. Uznaharody ŭručalisia rasijskim i zamiežnym hramadzianam, čaściakom pradstaŭlajucca im jak dziaržaŭnyja. Uznaharodami Akademii i Nacyjanalnaha kamiteta hramadskich uznaharod, zasnavanaha Akademijaj, z 2000 h. pa ciapierašni čas było ŭznaharodžana bolš za 40 tysiač čałaviek.

Akademijaj niezakonna prysvojvalisia śpiecyjalnyja zvańni, jakija supadajuć z voinskimi zvańniami ŭ Rasijskaj Fiederacyi. Arhanizacyjaj niezakonna vykarystoŭvalisia ŭzory formiennaha abmundziravańnia, anałahičnyja vajskovaj formie.

Supracoŭnikam Akademii vydavalisia słužbovyja paśviedčańni, jakija majuć padabienstva z paśviedčańniami dziaržaŭnaha ŭzoru, jakija vykarystoŭvalisia imi ŭ asabistych metach, što stvarała ŭmovy dla karupcyjnych prajavaŭ i dyskredytavała dziaržaŭnuju ŭładu. Mielisia fakty vykarystańnia słužbovych paśviedčańniaŭ Akademii pry ździajśnieńni złačynstvaŭ, jak praviła, ašukanskich dziejańniaŭ u asabliva bujnych pamierach.

Členam Akademii prysvojvalisia śpiecyjalnyja zvańni — sapraŭdny člen Akademii, člen-karespandent Akademii, a taksama hanarovyja zvańni «Zasłužany dziejač navuki ABOP» i «Zasłužany juryst ABOP» z uručeńniem adpaviednych nahrudnych znakaŭ i paśviedčańniaŭ.

Dysiertacyjnaj radaj i vyšejšym atestacyjnym kamitetam Akademii prysvojvalisia vučonyja stupieni i vučonyja zvańni (doktar navuk, kandydat navuk, prafiesar, dacent). Uzory dypłomaŭ i atestataŭ, jakija vydajucca Akademijaj, mieli padabienstva z dypłomami i atestaty dziaržaŭnaha ŭzoru,

Na dumku błohiera, supracoŭniki BiełTA nie ad bałdy pisali bijahrafiju V.Šejmana.

Navat kali sam Šejman nie viedaŭ, što ŭjaŭlaje saboj taja «Akademija», to, na dumku błohiera, jahonyja bijahrafičnyja źviestki pavinny byli praviarać adpaviednyja instancyi. A kali nie praviarali, to abo chałatna pastavilisia da svaich abaviazkaŭ, abo Šejman ź niejkich pryčyn nie padpadaje pad zvykłuju praceduru pravierki.

Błohier taksama stavić pytańnie, ci nie moh i Šejman atrymlivać nieabhruntavanyja dapłaty da słužbovaha akładu za vučonaje «zvańnie» łžeakademii.

Darečy, biełaruskaje adździaleńnie ABOP, hetaha kirmaša postsavieckaj fanaberyi, uznačalvaŭ niechta Mikałaj Ivanavič Čarhiniec.

• 0
• 0
• 0
• 0
• 0
• 0
• 0
• 0