Kampanija «Havary praŭdu!» pryniała rašeńnie vyjści na hetym etapie z usich pieramovaŭ ab vyznačeńni adzinaha kandydata ad apazicyi na prezidenckija vybary 2015 hoda. Pra heta było abvieščana 27 lutaha napres-kanfierencyi ŭ Minsku.
«Nam prapanoŭvajuć abmiarkoŭvać abrańnie adzinaha kandydata. Z majho punktu hledžańnia, siońnia hetaje pytańnie nie vyrašajem», — zajaviŭ lidar «Havary praŭdu!», Kandydat u prezidenty na vybarach 2010 hoda Uładzimir Niaklajeŭ.
Demakratyčnym siłam, miarkuje jon, spačatku treba pabudavać stratehiju sumiesnych dziejańniaŭ.
Namieśnik staršyni kampanii Andrej Dźmitryjeŭ miarkuje, što sprečki ab adzinym kandydacie «drobniać apazicyjnyja siły, rujnujuć ich adzinstva». «Hetyja sprečki tolki pakazvajuć, što my nie hatovyja supracoŭničać pamiž saboj. My hatovyja dyskutavać pra budučyniu krainy, ale nie ab drobnych pytańniach ŭnutry apazicyi. Demakratyčnyja siły pavinny dumać, jak damahčysia pieramienaŭ u krainie, a nie vyrašać tolki ŭnutranyja prablemy svaich struktur», — padkreśliŭ Dźmitryjeŭ.
Jak zaŭvažyŭ Niaklajeŭ, kampanija «Havary praŭdu!» nie prymała rašeńnia ab svaim udziele ŭ čarhovych vybarach praz vyłučeńnie kandydata ŭ prezidenty. «Na vybarach 2015 hoda ŭłady buduć stajać da śmierci. Tamu nam treba budzie mocna padumać, iści na vybary ci nie prymać u ich udzieł. Heta jak u vajnu, mirnaje nasielnictva nie moža vajavać z vojskam», — skazaŭ palityk.
Niaklajeŭ ličyć «całkam realnym» takoje raźvićcio padziej, pry jakim apazicyi pryjdziecca abviaścić bajkot prezidenckich vybaraŭ.«Ale rašeńnie ab hetym pavinien prymać adziny lidar. Demakratyčnym siłam čas abjadnoŭvacca. Davajcie skančać razborki pamiž saboj, jany ni da čaho nie pryviaduć», — zaklikaŭ lidar kampanii.
Pry hetym Niaklajeŭ padkreśliŭ, što «nie źbirajecca lubymi sposabami zavajoŭvać palityčnyja viaršyni». «Havary praŭdu!» nie choča vyleźci navierch, my chočam vystupić za pieramieny z usimi demakratyčnymi siłami», — zapeŭniŭ palityk.
