«Rasija pačynaje novuju hazavuju vajnu ź Biełaruśsiu» — tak pačynaje materyjał «Adklučalny manieŭr» hazieta «Kommiersant'». Vydańnie zaznačaje, što Biełaruś «u pieršym paŭhodździ apłačvała 55% koštu hazu z umovaj pahašeńnia astatnich 45% ($456,16 młn.) da 23 lipienia. Adnak u hety dzień hetyja hrošy ŭ «Hazprom» nie pastupili». «U rasijskaj hazavaj manapolii ŭpeŭnieny, što ŭ biełarusaŭ hrošy jość. U červieni AAT «Biełtranshaz» atrymała $625 młn. ad «Hazproma» ŭ jakaści apłaty za 12,5% akcyj AAT. Aprača taho, pačynajučy z 1 studzienia 2007 hoda «Biełtranshaz» źbiraje ź biełaruskich pramysłovych spažyŭcoŭ $140 za 1 tys. kub. m hazu, a «Hazpromu» na praciahu paŭhoda viartaŭ tolki $55. «My viedajem, što hrošy zachoŭvajucca na śpiecrachunku ŭ Nacbanku, adnak ułady Biełarusi nie dazvalajuć «Biełtranshazu» vykarystoŭvać svaje nakapleńni dla raźlikaŭ z «Hazpromam», — śćviardžaje krynica ' u «Hazpromie», — piša hazieta.
«Dahetul Minsk raźličvaŭ na toje, što Maskva vydaść «bratam‑siabram» kredyt u 1,5 młrd. doł., jakija i pavinny pajści na apłatu daŭhoŭ pierad «Hazpromam». Urad užo ŭchvaliŭ vydaču kredytu — pra heta zajaviŭ kiraŭnik Minfina Alaksiej Kudryn. Ale dla taho kab pieradača hrošaj adbyłasia, nieabchodna ŭnieści papraŭki ŭ biudžet Rasii. Poŭny pakiet papravak budzie kančatkova padrychtavany tolki ŭ kastryčniku, a značyć, u najbližejšyja try miesiacy Biełaruś musić siadzieć na mizernym hazavym pajku», — piša «Moskovskij komsomolec».
«Ciapier biełaruskija čynoŭniki vyrašajuć, jak adreahavać na hetyja zajavy kiraŭnictva pradpryjemstva («Hazproma». — BiełaPAN.), bo, pavodle ich słoŭ, skaračeńnie pastavak stała dla ich poŭnaj niečakanaściu. Adnak pradstaŭniki «Hazproma» zajavili, što ŭ Biełarusi jość čas adaptavacca da novych umoŭ i znajści šlachi vyjścia z hazavaha kryzisu, bo spažyvańnie hazu ŭ krainie ŭ letni pieryjad stabilna źnižajecca», — zaznačaje interniet‑vydańnie «Ytro.ru».
«Uličvajučy vopyt rasijska‑biełaruskich adnosin u naftahazavaj śfiery, całkam možna čakać, što «dalejšym krokam» Alaksandra Łukašenki budzie pierakryćcio tranzitu rasijskaha hazu cieraz terytoryju Biełarusi», — prahnazuje «Hazieta.ru».
«Prezident Biełarusi raźličvaje raściahnuć kanflikt da rasijskaj pieradvybarnaj kampanii 2008 hoda, — miarkuje namieśnik hienieralnaha dyrektara Centra palityčnych technałohij Alaksiej Makarkin. — Maŭlaŭ, napadkami na Biełaruś u pieradvyrabny pieryjad rasijskija ŭłady buduć apasacca siabie skampramietavać u vačach hramadskaści, i tut Biełaruś zmoža štości vyjhrać». Adnak palitołah pierakanany, što Łukašenka pamylajecca: «Jon prajecyjuje na ciapierašni čas pieryjad 90‑ch hadoŭ. Uładam tady było nieabchodna padtrymlivać imidž «adnaviciela SSSR», kab pazbavicca ampłua razburalnikaŭ impieryi. Tamu Rasija i padładžvałasia pad krainy SND, u tym liku i pad Biełaruś». Ale ciapier situacyja źmianiłasia: Uładzimiru Pucinu nie treba pazbaŭlacca niejkaha niehatyŭnaha imidžu, i jaho pierajemniku heta nie treba budzie. «Tamu Łukašenka vielmi pamylajecca, kali raźličvaje, što ŭ pieryjad pieradvybarnaj kampanii Rasija nie aśmielicca vystaŭlać Biełarusi ŭmovy», — piša «Hazieta.ru» ab palityčnych nastupstvach naftahazavaha kanfliktu.
