Jak piša rasijskaja hazieta «Moskovskije novosti», u Rasii śpieje novaja chvala emihracyi ŭ Biełaruś.
Biełaruś dla rasijcaŭ stała miescam «miakkaj emihracyi», jany abirajuć našu krainu nie tolki dla žyćcia, ale i dla biznesu, piša vydańnie. Hazieta nahadvaje, što ŭ rejtynhu Suśvietnaha banku Doing Business-2013 Rasija zajmaje 112-je miesca, a Biełaruś — 58-je. Adkryć biznes u Biełarusi možna za try dni.
Pry hetym ni karupcyja, ni biurakratyzacyja i kantrol dziaržavy nad ułasnaściu, jakija taksama jość u Biełarusi, ni devalvacyja biełaruskaha rubla ŭžo nie pałochajuć rasijski biznes, abkładzieny ŭ siabie na radzimie padatkami «pa samaje nie mahu».
Pavodle biznes-ambudsmiena Barysa Citova, paśla pavyšeńnia strachavych uznosaŭ da 34% rasijski biznes staŭ sychodzić u inšyja jurysdykcyi,
pierš za ŭsio ŭ Kazachstan, na druhim miescy — Biełaruś.
Pavodle vydańnia, Biełaruś stali surjozna razhladać jak miakki varyjant emihracyi, i heta tendencyja apošnich dvuch hadoŭ. Miakki, bo nie treba vučyć movu i mianiać pašpart. Aficyjnaj statystyki pa pierajezdach niama — Biełaruś u Rasii nie ličycca sapraŭdnym zamiežžam. Ale biełaruskija ryełtary ŭ pryvatnych razmovach pryznajuć, što ciapier pajšoŭ vialiki patok achvočych pierajechać na stałaje žycharstva z Rasii ŭ Biełaruś.
«Muž kaža, što budziem tam miljanierami. Pra režym Łukašenki ja, viadoma, viedaju. Ale i naš režym mianie taksama vielmi napružvaje.Tam pradukty narmalnyja, ekalohija pakul našmat lepšaja», — cytuje vydańnie typovaje paviedamleńnie na papularnym forumie, u temie, pryśviečanaj emihracyi ŭ Biełaruś.
«Heta jak ža treba było ŭładkavać Rasiju za 10 hadoŭ, kab Biełaruś rajem zdałasia», — padsumoŭvajuć «MN».
Kamientary