Pucin usio bolš pracuje pa načach. Pres-kanfierencyju dla zamiežnych žurnalistaŭ pačali ŭ 23:30 — i heta ŭžo norma

Mahčyma, mnohich ździviła toje, što sustreča prezidenta Rasii z pradstaŭnikami viadučych zachodnich infarmacyjnych ahienctvaŭ u sieradu pačałasia amal apoŭnačy — u 23:30. Adnak, jak śviedčyć analiz rabočaha hrafika Pucina, načnaja aktyŭnaść — norma apošnich hadoŭ.

Tak były žurnalist kramloŭskaha puła ŭ adnym z intervju vydańniu «Ahienctva» raskazaŭ, što jašče ŭ druhoj pałovie 2010-ch pra takuju zvyčku nie było nijakaj havorki:

«Nielha było sabie ŭjavić, kab narada pa ekanomicy pačynajecca ŭ rajonie 21-j hadziny. Ja z Kramla samaje poźniaje a siomaj viečara sychodziŭ, a to i raniej, u Nova-Aharovie ŭsio zvyčajna było pamiž 13 i 17 hadzinami prykładna. U Bačarovym ručai ŭ Sočy taksama było ŭsio ŭ siaredzinie dnia».

Redkija vyklučeńni z hetaha praviła ŭ 2010-ja hady možna pieraličyć pa palcach. Jak praviła, jany byli źviazany nie z płanavymi mierapryjemstvami, a z nadzvyčajnymi ci mižnarodnymi padziejami. Naprykład, adnoj ź niamnohich načnych rabočych siesij taho pieryjadu stali pieramovy «narmandskaj čaćviorki» pa Ukrainie ŭ lutym 2015 hoda, jakija zaciahnulisia na ŭsiu noč. Pahadnieńnie Minsk-2 było vypracavana tolki pad ranicu.

Zhodna z analizam «Ahienctva», kolkaść dzion, kali Pucin paśla 20:00 pravodziŭ sustrečy i narady, pačała raści z 2022 hoda.

Tak, kali ŭ 2021 hodzie tolki redkija aficyjnyja mierapryjemstvy z udziełam Pucina pravodzilisia paśla vaśmaj viečara, to ŭ 2022-m jany skłali kala 15%. U 2023-m hodzie ŭžo kožny čaćviorty dzień z aficyjnymi mierapryjemstvami zakančvaŭsia pozna ŭviečary.

Asabliva charakterny rost mienavita hłyboka načnych padziej — tych, što prachodziać paśla 23:30. Kali ŭ 2022-m Kreml raskazaŭ ab troch mierapryjemstvach z ŭdziełam Pucina, jakija pačalisia kala apoŭnačy, to ŭ 2023-m takich načnych sustreč było nie mienš za vosiem.

Rost načnoj aktyŭnaści Pucina šmat u čym supaŭ pa časie z narastańniem unutranych i źniešnich vyklikaŭ dla Kramla. Ekśpierty i insajdary vyłučajuć niekalki tłumačeńniaŭ hetaj źjavie.

Vajenna-palityčnyja kryzisy

Pa nazirańni žurnalistaŭ, najbolšaja kolkaść poźnich mierapryjemstvaŭ prypadaje na pieryjady vostrych padziej.

Naprykład u lutym 2022 hoda (pačatak bajavych dziejańniaŭ suprać Ukrainy) Pucin mieŭ bolš za 30% dzion z aficyjnymi sustrečami pozna ŭviečary i nočču. Hetaksama było i ŭ druhoj pałovie 2023 hoda, kali vajna praciahvałasia, a ŭnutrypalityčnaja situacyja patrabavała pavyšanaj uvahi. U kastryčniku 2023 hoda pracoŭnych dzion z aficyjnymi mierapryjemstvami paśla 20:00 było 42%.

U 2024-m hodzie pres-sakratar Pucina Piaskoŭ adznačaŭ, što Pucin «dniom i nočču» atrymlivaje spravazdačy vajennych i asabista kantraluje pytańni ŭ abłaściach z vostraj situacyjaj, znachodzicca ŭ «štodzionnym ci štohadzinnym kantakcie z hłavami rehijonaŭ».

Asabistyja zvyčki samoha Pucina

Pavodle šerahu śviedčańniaŭ, prezident Rasii — typovaja sava: jon addaje pieravahu pracavać u načny čas, kali jaho nie adciahvajuć źniešnija kantakty, i časta pieranosić aznajamleńnie z dakumientami, prahlad zvodak i pryniaćcie rašeńniaŭ na poźni viečar ci navat noč. Ź ciaham času taki režym dnia pačaŭ adbivacca i na aficyjnym raskładzie.

Bijałahičny faktar

Z uzrostam u niekatorych ludziej mohuć adbyvacca źmieny ŭ cyrkadnych rytmach, jakija ŭpłyvajuć na režym dnia. U pažyłych ludziej (paśla 50-60 hadoŭ) časta skaračajecca patreba ŭ śnie — z 7-9 hadzin da 6-7 hadzin u sutki, što moža pryvodzić da pavyšeńnia aktyŭnaści ŭviečary.

Akramia taho, chraničny stres i vysokaja adkaznaść, źviazanyja z palityčnymi kryzisami, mohuć pavyšać uzrovień kartyzołu i adrenalinu, što pieraškadžaje narmalnamu snu i zrušvaje pik aktyŭnaści na noč. U niekatorych vypadkach parušeńni snu, takija jak insamnija, mohuć vymušać čałavieka pracavać u načny čas.

U 2020-m hodzie Pucin raskazaŭ žurnalistam, što časam pracuje ŭ Kramli da druhoj hadziny nočy i tady zastajecca tam načavać. A ŭ vieraśni 2024-ha na sustrečy z školnikami ŭ stalicy Tuvy Kyzyle ŭ pačatku navučalnaha hoda pryznaŭsia, što zvyčajna śpić pa šeść hadzin u sutki, što adpaviadaje bijałahičnym asablivaściam pažyłych ludziej.

Važna adznačyć, što padnačalenym i atačeńniu prezidenta Rasii pryjšłosia adaptavacca da novych hadzin pracy. Niekatoryja paraŭnoŭvajuć novy rabočy rytm Pucina z hrafikam pracy Stalina, jaki z kanca 1930-ch hadoŭ usio bolš staŭ pravodzić narady i sustrečy pozna viečaram i nočču.

• 0
• 2
• 3
• 0
• 0
• 0
• 2
• 0