MTS: taryf — «Dziciačy», apłata — niedziciačaja? Dasłaŭ čytač. A što vy dumajecie pra hetuju situacyju? Vykazvajciesia ŭ kamientarach. 54

U žniŭni 2008 kampanija MTS abviaściła pra zapusk novaha taryfnaha płanu «Dziciačy», raspracavanaha admysłova dla dziaciej. Pry padklučeńni abo pierachodzie na taryf «Dziciačy» abanientu nieabchodna było pradjavić paćviardžeńnie najaŭnaści dziaciej va ŭzroście da 14 hadoŭ. Bolš padrabiazna ab hetaj prapanovie možna pračytać na sajcie apieratara.

U majoj siamji pasłuhami MTS karystajucca ŭsie, chto maje mabilnyja telefony. Tamu na taryf «Dziciačy» padklučyli starejšuju dačku, jakoj na toj momant było 8 hadoŭ.

Rehularna ja ŭnosiŭ na asabisty rachunak jaje mabilnaha telefona nievialikija, ale dastatkovyja dla padtrymańnia kamunikacyi srodki. Pakul nie zdaryłasia niečakanaje.

Niekalki dzion tamu maja žonka atrymała list z hałaŭnoha ofisa STAA «Mabilnyja TeleSistemy» . Heta była pretenzija ab pahašeńni zapazyčanaści (u paradku dasudovaha vyrašeńnia spravy).

Na naša ździŭleńnie, zapazyčanaść u niekalki sotniaŭ tysiač rubloŭ ŭtvaryłasia na numary, jakim karystałasia dačka.

U pracesie chatniaha śledstva, praviedzienaha našymi sumiesnymi z žonkaj namahańniami, vyśvietliłasia, što kala dvuch miesiacaŭ tamu na mabilny telefon dački pastupili SMS-paviedamleńnia machlarskaha źmiestu. U ich nieviadomy adpraŭnik prasiŭ dačku adpravić jamu ŭ adkaz sms, u jakim adkazać stanoŭča na roznyja pytańni (słovam «tak»). Z apoviedu svajoj dački ja zrazumieŭ, što

numar mabilnaha telefona staŭ viadomy ašukancam z sacyjalnaj sietcy «Ukantakcie», dzie jana zarehistravanaja. Maja dačka, nie padazrajučy ab padmanie, pasłała niekalki (da dziesiaci) sms-paviedamleńniaŭ na pakazany karotki numar.

U vyniku bałans na telefonie pamienšyŭsia na 500 tysiač rubloŭ.

Ab tym, što adbyłosia, dačka nam nie paviedamiła. Pabajałasia. Što całkam zrazumieła, uličvajučy jaje ŭzrost. Za apošnija paru zapazyčanaść skaraciłasia. Niaznačna. Paru razoŭ na rachunak pakłaŭ hrošy ja (ni pra što nie padazrajučy), adzin raz žonka, asnoŭnuju ž sumu ŭniesła ŭ košt pahašeńnia doŭhu sama dačka z tych hrošaj, jakija my davali joj na kišennyja vydatki. Zrešty, hetych układańniaŭ nie chapiła, kab pahasić doŭh całkam.

Pieršaj dumkaj było: raspłacicca i zabycca. Z kim nie byvaje. Zadumacca prymusiła žonka, uspomniŭšy, što damova była zaklučanaja ź joj u adnosinach da dziciaci, a sam taryfny płan nazyvaŭsia «Dziciačy».

Zarehistravaŭšysia na sajcie MTS, ja vyvučyŭ detali asabistaha rachunku mabilnaha telefona dački. Akazałasia, što pasłuha pa adpraŭcy darahich sms była pradastaŭlena ŭ toj momant, kali na rachunku ŭ telefonie nie było srodkaŭ (ja jašče nie paśpieŭ papoŭnić bałans, a tyja hrošy, što byli raniej, užo «vyhavarylisia»). Z hetaha vynikała, što pasłuha pa pierasyłcy sms-paviedamleńniaŭ pradastaŭlałasia majoj dačce ŭ kredyt. Adnak pasłuha pa pradastaŭleńni kredytu (takaja jak «terminovy kredyt», «kredyt davieru», «abiacany płaciož») na mabilnym telefonie majoj dački ŭ toj pieryjad nie aktyvavałasia.

Na sajcie MTS u raździele «Abarona ad machlaroŭ» skazana, što «kampanija MTS zmahajecca z telefonnym machlarstvam i zaŭsiody imkniecca papiaredzić padobnyja złačynstvy». Dumaju, kampanii MTS varta było b prykładać bolš namahańniaŭ dla baraćby z telefonnym machlarstvam, uličvajučy, što jana maje taryfnyja płany («Dziciačy»), śpiecyjalna pryznačanyja dla karystańnia niepaŭnaletnimi, jakija vałodajuć abmiežavanaj dziejazdolnaściu. Paśla ŭžo ja daviedaŭsia ad dački ab tym, što nie jana adna stała achviaraj machlarskich dziejańniaŭ.

Na dniach ja adpraviŭ adkaz na pretenziju STAA «Mabilnyja TeleSistemy», u jakim paviedamiŭ apierataru ab tym, što nie pryznaju ŭ dobraachvotnym paradku doŭh i admaŭlajusia ad jaho vypłaty. «Vaša palityka, — napisaŭ ja, — u dačynieńni da niepaŭnaletnich abanientaŭ, jakija vałodajuć abmiežavanaj hramadzianskaj dziejazdolnaściu, pavinna budavacca z ulikam ich zakonnych intaresaŭ. Ažyćciaŭleńnie techničnaj padtrymki takoj palityki pavinna stać realnaj asnovaj isnavańnia śpiecyjalizavanych taryfnych płanaŭ jak «Dziciačy».

Jak budzie dalej, skazać nie biarusia. Vierahodna, mianie čakaje hramadzianski pazoŭ. Ale svajo mierkavańnie, vykładzienaje vyšej, ja hatovy adstojvać i ŭ sudzie.

Ad redakcyi

U słužbie padtrymki kampanii MTS paviedamili, što taryf «Dziciačy» nie maje aŭtamatyčnaj błakiroŭki pry admoŭnym bałansie rachunka. «U damovie prapisana, što kampanija moža, ale nie abaviazana zabłakavać pasłuhi pry admoŭnym bałansie. Kab uklučyć aŭtamatyčnuju błakiroŭku pry admoŭnym bałansie, treba źviarnucca ŭ ofis kampanii z pašpartam», — paviedamiła supracoŭnica MTS.

Treba taksama ŭśviedamlać, što choć taryf i nazyvajecca «Dziciačy», ale ŭsio adno sim-kartka rehistrujecca na adnaho z baćkoŭ, to bok, paŭnaletniuju dziejazdolnuju asobu, i adkaznaść pa apieracyjach z hetaj sim-kartkaj lažyć na ŭkazanym u damovie čałavieku.

Pamiatajcie, što mabilnyja apieratary — kamiercyjnyja arhanizacyi, metaj jakich źjaŭlajecca atrymańnie prybytku, i svaje hrošy jany nie ŭpuściać. Tamu ŭvažliva čytajcie i analizujcie damovy! A jašče pilna sačycie za dziaćmi. Asabistaja infarmacyja ŭ sacyjalnych sietkach — sapraŭdnaja prynada machlaroŭ. Navat darosłym nie rekamiendujuć vykładać «Ukantakcie» numar telefona, što ž kazać pra niepaŭnaletniuju dziaŭčynku.