Papa na intranizacyi zaklikaŭ baranić słabych i achoŭvać pryrodu 13

Bieł-čyrvona-biełyja ściahi: biełaruskija pilihrymy taksama prysutničali na intranizacyi Papy.

U Vatykanie adbyłasia cyrymonija intranizacyi novaha papy. Papa Francišak adroksia mnohich atrybutaŭ raskošy, jakija byli ŭłaścivy Vatykanu ŭ minułym. Tak, na cyrymoniju jon pryjechaŭ nie na braniravanym papamabili, a ŭ adkrytym džypie. Jon časta spyniaŭsia, kab pavitać ludziej, a adzin raz navat vyjšaŭ z mašyny, kab pabłasłavić invalida.

Nahadajem, što 13 sakavika novym Papam byŭ abrany arcybiskup Buenas-Ajresa Chorchie Maryjo Bierholia, jaki vybraŭ sabie imia Francišak.

Siarod inšych nacyjanalnych ściahoŭ, na płoščy Śviatoha Piatra zaŭvažany i bieł-čyrvona-biełyja.

Svaju kazań papa pramoviŭ na italjanskaj movie.

Kazań papy Franciška była pryśviečana Śviatomu Jazepu i paniaćciu, jakoje vyražajecca ŭ jomistym italjanskim słovie «custodire» — zachoŭvać, achoŭvać, bierahčy, dbać, dahladać — va ŭsich jahonych značeńniach: zachavańnie carkvy, achova pryrody, kłopat pra dziaciej i starejšych ludziej, luboŭ da blizkaha i dapamoha samym słabym na hetym śviecie. Papa cytavaŭ papu Jana Paŭła II i śviatoha Franciška z Asizi. «Ułada — heta słužeńnie», skazaŭ Francišak. Słužeńnie biednym, słabym, chvorym, źniavolenym, ukryŭdžanym, nahadaŭ papa.

Na cyrymonii prysutničali aficyjnyja delehacyi z 130 krain.

Paśla imšy papa prymie vysokich haściej u bazilicy Śviatoha Piatra. U sieradu papa sustreniecca z delehacyjami 30 chryścijanskich cerkvaŭ, a taksama musulmanaŭ, judziejaŭ, budystaŭ, sikchaŭ i džajnaŭ. U piatnicu jon prymie dypłamataŭ, akredytavanych pry Śviatym Pasadzie. Na subotu ŭ jaho zapłanavanaja sustreča z byłym papam Bieniedyktam XVI. A ŭ niadzielu jon uznačalić śviatkavać Vierbnaj (Palmovaj) niadzieli.

Cyrymonija intranizacyi doŭžyłasia tolki dźvie hadziny. U Bieniedykta XVI heta ciahnułasia try hadziny.

Pradstaŭnik kanstancinopalskaha patryjarchata ŭ paniadziełak abviaściŭ, što Jaho Śviataść archijepiskap Kanstancinopala — Novaha Ryma i ŭsialenski patryjarch Varfałamiej I pryjechaŭ u Rym

na cyrymoniju intranizacyi papy rymskaha Franciška. Takoha nie było ad 1054 hoda, z času Vialikaha raskołu chryścijanskaj carkvy na zachodniuju katalickuju i ŭschodniuju pravasłaŭnuju.

Sa svajho boku, vatykanskija ŭłady vyrašyli, što padčas intranizacyi Jevanhielle buduć čytać nie na łacinie, jak heta robicca zvyčajna, a na hrečaskaj movie ŭ znak pavahi da pravasłaŭnaj tradycyi.