U miežach EPPV (Ekałahičnaje partniorstva paŭnočnaha vymiareńnia) Šviecyja siońnia praź JEBRR (Jeŭrapiejski bank rekanstrukcyi i raźvićcia) i PIB (Paŭnočny inviestycyjny bank) padtrymlivaje inviestycyi ŭ ekałahičnyja prajekty ŭ piaci haradach Biełarusi: Hrodnie, Viciebsku, Baranavičach, Breście i Słonimie.
Padtrymka nakiroŭvajecca praz šviedskuju dziaržaŭnuju ŭstanovu SIDA i składaje 13,6 młn jeŭra, jakija ŭklučajuć u tym liku niezvarotnuju subsidyju ŭ sumie 3,5 młn jeŭra ŭ Hrodnie i 2,7 młn jeŭra ŭ Viciebsku na ačyščalnyja zbudavańni, a taksama niezvarotnuju subsidyju ŭ sumie 2,8 młn jeŭra na budaŭnictva bijahazavych ustanovak u Baranavičach i Słonimie. Ahulny abjom inviestycyj u Hrodnie, Viciebsku i Breście składaje 65 młn jeŭra, a taksama ŭklučaje niezvarotnuju subsidyju ŭ pamiery 6 młn jeŭra ad EPPV i kredyt u pamiery 33,5 młn jeŭra ad JEBRR, što daść mahčymaść madernizavać vodaačyščalnyja sistemy hetych haradoŭ zhodna z patrabavańniami ES i HELCOM.
U cyrymonii padpisańnia, jakaja adbyłasia siońnia ŭ Minsku, uziaŭ udzieł kiraŭnik pracoŭnaj hrupy Juakim Vaern, pradstaŭnik Departamienta Uschodniaj Jeŭropy i Centralnaj Azii Ministerstva zamiežnych spravaŭ Šviecyi. «Šviedskaja padtrymka pakazvaje, nakolki važnymi my ličym hetyja prajekty dla navakolnaha asiarodździa, i nie tolki dla ŭsiaho rehijonu Bałtyjskaha mora, — zajaviŭ jon. — Raźvićcio ŭstojlivaha vodazabieśpiačeńnia i ačystki ściokavych vodaŭ u pieršuju čarhu adpaviadaje intaresam nasielnictva hetych piaci haradoŭ Biełarusi. Siońniašniaje padpisańnie damovy ab niezvarotnaj subsidyi źjaŭlajecca jašče adnym krokam u napramku da źmieny situacyi praz palapšeńnie stanu navakolnaha asiarodździa jak u Biełarusi, tak i ŭ Bałtyjskim rehijonie. My, naturalna, čakajem chutkaj realizacyi hetych prajektaŭ i praciahu efiektyŭnaha supracoŭnictva z našymi partniorami ŭ Biełarusi, inšymi donarami i mižnarodnymi arhanizacyjami».
