«Soniečny» kala Kurapataŭ zasialajecca pavoli.
«Marjaliva Kantry Kłab» budujecca pa aryhinalnym litoŭskim prajekcie.
Taŭnchaus pad Zasłaŭjem tak nie znajšoŭ žycharoŭ.
«Talisman» na ŭskrajku Baraŭlanaŭ — prajekt praściecki, ale miesca dobraje.
«Dabradziejeva» - heta na ŭjeździe ŭ Tarasava.
Heta dvuch- ci trochpaviarchovy dom, jaki składajecca ź niekalkich šmatuzroŭnievych kvater ź izalavanym uvachodam i ahulnymi bakavymi ścienami. Da žylla prykładajecca i maleńki kavałak ziamli.Dyskusiju nakont taho, dzie žyć kamfortniej — u kvatery ci ŭ pryvatnym domie, možna praciahvać biaskonca. U mnohich krainach śvietu dla tych, chto dahetul nie moža vyznačycca, isnuje i pramiežkavy varyjant — taŭnchaus.
Pad Minskam budaŭnictva pieršych taŭnchausaŭ pačałosia ź dziasiatak hadoŭ tamu, adnak nivodnaha całkam zavieršanaha prajekta dahetul niama. «Naša Niva» adsačyła, jakija prapanovy jość na rynku ciapier.
«Soniečny» — ad $160 tysiač
Hety pasiołak znachodzicca na poŭnačy stalicy, zusim pobač z Kurapatami, ale terytaryjalna naležyć da Minskaha rajona.
«Soniečny» pačali budavać u dalokim 2003. Kanca-kraju nie vidać navat na haryzoncie. Pieršaja linija taŭnchausaŭ užo zda-dzienaja i navat častkova zasielenaja. Astatnija haspadary marna čakajuć svaich damoŭ. Pobač z taŭnchausami tym časam budujucca i šmatkvaternyja damy.
Zabudoŭščyk — hrupa kampanij «Aresa-Servis» budaŭničaha miljaniera Siarhieja Kareńki — nie śpiašajecca i kormić klijentaŭ abiacankami. Kvadratny mietr taŭnchausa kaštuje $700—800. Adnak zabudoŭščyk nie curajecca brać hrošy za padvał pa tym ža ceńniku. U vyniku nabiahaje $160 tysiač za dvuchuzroŭnievy (+padvał) taŭnchaus płoščaj 223 m2 ci $205 tysiač za trochuzroŭnievy, płoščaj 290 m2. Žyllo abiacajuć zdać pad kaniec hoda, adnak terminy vyhladajuć sumnieŭnymi.
«Soniečny» prajektavaŭsia jak aŭtanomny pasiołak, adnak svajoj infrastrukturaj jon moža pachvalicca tolki na papiery.Sadok, škoła, miedcentr, kramy, apteki i restarany dy inšyja pieravahi haradskoha žyćcia, moža, i źjaviacca, ale niachutka. Pakul ža isnujuć handlova-zabaŭlalny centr «Ekspabieł» z hipiermarkietam «Bihz» pad bokam. Da jaho 500 m, kali iści naprastki pa poli, albo 2 km, kali jechać na mašynie.
Zabudoŭščyk nazyvaje adnoj ź pieravah «Soniečnaha» vydatnuju ekałohiju, ale nie treba zabyvacca pra blizkaść z kalcavoj darohaj i nievialiki chimičny zavod, adkryty niadaŭna ŭ susiednim Drozdavie.
«Dabradziejeva» — ad $152 tysiač
Pasiołak Tarasava ź niekalkimi linijami taŭnchausaŭ adnosicca da Ždanovickaha sielsavieta. Heta zachodni vyjezd ź Minska i litaralna 1 km ad kalcavoj darohi.
Tut spravy ruchajucca našmat chutčej, prynamsi, mnohija damy zasielenyja. I choć žylcy narakajuć na brak — naprykład, elektrapravodka ŭ taŭnchausach nie vytrymlivaje vysokaha napružańnia, pasiołak paŭnavartasna funkcyjanuje.
Damy składajucca z troch dvuchuzroŭnievych taŭnchausaŭ sa svabodnaj płaniroŭkaj płoščaj ad 145m2 da 210 m2. Kvadratny mietr u ich kaštuje $1050—1200.
«Marjaliva Kantry Kłab» — $182 tysiačy
Svaje taŭnchausy zapłanavanyja i ŭ elitnym pasiołku hazavikoŭ Marjaliva, što za dziasiatak kiłamietraŭ ad Minska ŭ łahojskim kirunku.Tut na vulicy Jasienievaj budujecca vosiem taŭnchausaŭ. Pakul što darablajecca pieršy ź ich i zakładajecca padmurak druhoha.
Razynka prajekta — nievialikaja płošča dvuchuzroŭnievaha taŭnchaŭsa, usiaho 140 m2. Zatoje kvadratny mietr kaštuje doraha, $1300.
Architekturny prajekt padrychtavany litoŭcami, i vyhlad sapraŭdy vyłučaje «Marjaliva Kantry Kłab» siarod kankurentaŭ.
«Talisman» — ad $212 tysiač
Nie samy raskručany prajekt uzvodzicca na ŭskrajku Baraŭlanaŭ — 4 km ad Minska. Adnak ruchajecca budoŭla značna lepš, čym u kankurentaŭ.
Praŭda, hetyja trochuzroŭnievyja taŭnchausy składana nazvać architekturna aryhinalnymi. Kvadratny mietr tut kaštuje $900. Možna vybrać z dvuch vidaŭ taŭnchausaŭ — pa 235 m2 i 273 m2. Uletku musić być zdadzieny druhi kompleks damoŭ.
Zamarožanaje budaŭnictva
Jašče adzin katedžny pasiołak z taŭnchausami budavaŭsia pad Zasłaŭjem. Jahonaja budaŭničaja hatoŭnaść niekalki hadoŭ tamu składała kala 80%, adnak prajekt tak i nie byŭ skončany. Zabudoŭščyk, kampanija «Minskvadbud», sprabavała pradać jaho choć kamu. Prapanoŭvałasia navat pierabudavać žyłyja damy pad turystyčnuju bazu ci internaty, dy ŭsio marna.
Plusy i minusy taŭnchausaŭ
+ Ekałahičnaść u paraŭnańni z horadam
+ Tańniej za budaŭnictva katedža
+ Najaŭnaść łapika ŭłasnaj ziamli
+ Najaŭnaść haraža
+ Vysoki sacyjalny status susiedziaŭ
- Nieraźvitaja infrastruktura
- Maleńki ŭčastak ziamli
- Darahoje techabsłuhoŭvańnie
- «Zaležnaść» ad susiedziaŭ
- Nizkaja hukaizalacyja praź isnavańnie supolnych ścien
