Milinkievič, Niaklajeŭ i Janukievič zaklikali Jeŭropu da adnabakovych krokaŭ nasustrač Biełarusi

«Bolš Jeŭropy dla Biełarusi». Sumiesnaja zajava lideraŭ demakratyčnych siłaŭ

Ruch «Za svabodu», Hramadzianskaja kampanija «Havary praŭdu» i Partyja BNF ličać nieabchodnym abjadnać namahańni dla abarony i prasoŭvańnia intaresaŭ hramadzianaŭ Biełarusi i ŭmacavańnia suvierenitetu krainy.

My ŭpeŭnienyja, što tolki viartańnie da paŭnavartasnaha dyjałohu i supracoŭnictva pamiž Biełaruśsiu i Jeŭrapiejskim Sajuzam istotna pašyryć mahčymaści našaj krainy i hramadstva dla madernizacyi i pabudovy demakratyčnaha ładu.

My zychodzim z taho, što paŭnavartasny dyjałoh mahčymy tolki paśla vyzvaleńnia palityčnych viaźniaŭ, uklučajučy spynieńnie dziejańnia sudovych rašeńniaŭ u dačynieńni da ŭmoŭna asudžanych i asudžanych z adterminoŭkaj vykanańnia prysudu. U toj ža čas, my ličym, što dla ŭmacavańnia stabilnaści ŭ rehijonie i niezaležnaści našaj krainy Jeŭrapiejski Sajuz užo ciapier moža raspačać šerah krokaŭ, jakija adnačasova buduć spryjać bolšaj adkrytaści biełaruskaha hramadstva i praviadzieńniu nieadkładnych ekanamičnych reformaŭ.

My zaklikajem ES u adnabakovym paradku:

1. Maksimalna spraścić vizavy režym dla hramadzian Biełarusi, zychodziačy z mahčymaściaŭ, jakija daje Vizavy kodeks ES, z dalejšym poŭnym skasavańniem konsulskaha zboru za vydaču šenhienskich vizaŭ;

2. Vyjavić inicyjatyvu i pačać praktyčnuju realizacyju ŭ dačynieńni da hramadzian Biełarusi ŭmovaŭ pahadnieńnia ab małym pamiežnym ruchu ź Biełaruśsiu ŭ 50 km zonie na miažy z Polščaj i Litvoj;

3. Spraścić dla małoha i siaredniaha biźniesu praviły stvareńnia i funkcyjanavańnia ŭ ES sumiesnych biełaruska-jeŭrapiejskich pradpryjemstvaŭ;

4. Pašyryć mahčymaści dla biełarusaŭ atrymlivać jeŭrapiejskuju adukacyju, u tym liku šlacham poŭnafarmatnaha dostupu biełaruskich studentaŭ da ŭdziełu ŭ prahramie ERASMUS, pavieličeńnia kvotaŭ dla biełarusaŭ na bakałaŭrskich i mahistarskich prahramach jeŭrapiejskich univiersitetaŭ; prafiesijnych stažyrovak u dziaržaŭnych strukturach krainaŭ Jeŭrasajuza, NDA i fabrykach dumki; pašyreńnia daśledčych prahramaŭ, nakiravanych na vyvučeńnie Biełarusi, a taksama istotnaha pašyreńnia prahramaŭ abmienu dla pradstaŭnikoŭ biźniesu, dziaržaŭnych struktur, navukovych arhanizacyj, hramadzianskaha i palityčnaha siektaraŭ.

5. Pašyryć padtrymku arhanizacyj hramadzianskaj supolnaści i demakratyčnych siłaŭ, jakija pracujuć ŭnutry Biełarusi.

My prapanujem, u vypadku vykanańnia ŭradam Biełarusi raniej adznačanych umovaŭ i adnaŭleńnia paŭnavartasnaha dyjałohu ź ES, viarnucca da pieramovaŭ z aficyjnym Minskam u miežach «Sumiesnaha časovaha płanu» (kansultacyi byli raspačatyja vosieńniu 2010 hoda), što budzie spryjać madernizacyi i libieralizacyi Biełarusi.

My padtrymajem lubyja dziejańni, jakija buduć adpaviadać pryncypu — «bolš Jeŭropy dla Biełarusi i biełarusaŭ».

My zaklikajem Jeŭrapiejski Sajuz:

— spryjać nabližeńniu Biełarusi da jeŭrapiejskich standartaŭ u roznych halinach, kirujučysia žadańniami jaje hramadzianaŭ i niahledziačy na supraćdziejańnie ŭładnaj elity;

— nie hulać pa praviłach, ustanoŭlenych biełaruskimi ŭładami, nie čakać rašeńniaŭ biełaruskich uładaŭ tam, dzie ES moža prymać ułasnyja rašeńni.

My ŭsimi siłami padtrymlivajem inicyjatyvu «Jeŭrapiejski Dyjałoh ab madernizacyi» ź biełaruskim hramadstvam i zaklikajem ułady Biełarusi nieadkładna dałučycca da jaje realizacyi.

Zaklikajem demakratyčnuju supolnaść Biełarusi ŭsialak spryjać ździajśnieńniu Jeŭrapiejskim Sajuzam salidarnych dziejańniaŭ, jakija spryjajuć praviadzieńniu demakratyčnych i rynkavych reformaŭ u Biełarusi i sadziejničajuć ruchu krainy da jeŭrapiejskich standartaŭ.

Alaksandr Milinkievič, lider ruchu «Za Svabodu»

Uładzimir Niaklajeŭ, lider kampanii «Havary praŭdu»

Alaksiej Janukievič, lider Partyi BNF

• 0
• 0
• 0
• 0
• 0
• 0
• 0
• 0