Na kasach Moładzievaha teatra estrady źjaviłasia abviestka, što kancert «Žyć dla Biełarusi» pamiaci aśvietnicy i pradziusara histaryčnaj muzyki Aryny Viačorki admianiajecca. Napiaredadni kvitki źnikli z sajtu kvitki.by.
Pavodle inicyjatara kancertu Vitala Supranoviča, pryčyny admieny kancerta niezrazumiełyja: «Kancert rychtavaŭsia, rekłama pajšła, pradadzienyja kvitki. Prablemaŭ taksama nie było. Heta ŭsio ž taki kancert pamiaci Aryny, a nie palityčnaja akcyja. Pra admienu kancertu ja daviedaŭsia vypadkova, kali niečakana źnikli kvitki z prodažu. Pajechaŭ u teatr razabracca. Na stale ŭ namieśnika dyrektara Karalova lažała afiša našaha kancertu. Jon skazaŭ, što kancert admianiajecca, alternatyŭnych dataŭ prapanavać nijakich nia moža, tolki ŭvosień».
Supranoviču paviedamili, što aficyjnaja pryčyna admieny kancertu — list ź Ministerstva kultury pra dadatkovyja repetycyi dla śviatočnych majskich kancertaŭ.
Načalnica kancertnaha adździeła Iryna Paźniakova paćvierdziła admienu kancertu. Pavodle jaje słovaŭ, 23-25 krasavika ŭ Moładzievym teatry estrady adbuducca repetycyi majskich śviataŭ, i mierapryjemstvy daviałosia admianić. Adnak, jak paśla stała viadoma, inšyja kancerty — 23 i 25 krasavika — adbuducca.
Pavodle słovaŭ Franka, syna Aryny Viačorki, zabarona kancertu — pomsta Arynie za jaje aktyŭnuju biełaruskuju kulturnuju i hramadzkuju dziejnaść dy nianaviść ułady da žyvoj biełaruskaj kultury:
«Aryna šmat hadoŭ pracavała ŭ tym teatry, arhanizavała tam dziasiatki kancertaŭ.Dumaju, nie abyšłosia tut bieź śpiecsłužbaŭ. Aryna ŭžo hod nie žyvie. Hańba kiraŭnictvu teatru i tym, chto zabaraniŭ kancert: jany bajacca navat pamiaci pra čałavieka, jaki adkryŭ cełamu pakaleńniu biełaruskuju histaryčnuju muzyku. Symbalična, što aficyjnaja pryčyna zabarony kancertu — śviatkavańnie savieckich travieńskich śviataŭ. Na inšaje ŭ ich navat fantazii nie chapiła».
Svajaki i siabry Aryny Viačorki zaprašajuć na paminalnuju słužbu, jakaja, vierahodna, adbudziecca ŭ Pietrapaŭłaŭskaj carkvie ŭ Minsku 24 krasavika.
***
Kancert «Žyć dla Biełarusi» pamiaci Aryny Viačorki mieŭ adbycca 24 krasavika a 19-j hadzinie ŭ Moładzievym teatry estrady. Siarod vystupoŭcaŭ byli zajaŭlenyja vykanaŭcy biełaruskaj histaryčnaj, aŭtarskaj i fołk-pieśni, viadomyja rok-muzyki: hurt GUDA, Todar i WZ-orkiestra, Kasia Kamockaja, Alaksandar Pamidoraŭ, Palina Respublika, Źmicier Bartosik, Źmicier Sasnoŭski, Taćciana Biełanohaja, Aleś Čumakoŭ, Andre Karp, «Šalmoŭski teatr DyHryza» dy inšyja.
Kamientary